Kanadalyq ánshi Selın Dıon alty jyldan keıin alǵash ret tolyqqandy jeke konsertin Parıjde berdi. Bul onyń emdelmeıtin aýrýy týraly málimdegennen keıingi sahnaǵa alǵashqy shyǵýy boldy, dep habarlaıdy infohub.kz saıty.
Dıon 2022 jyldyń jeltoqsanynda óziniń dıagnozy — bulshyqet qaqsaý sındromy týraly aıtqan bolatyn. Bul — sırek kezdesetin aýtoımmýndy nevrologıalyq aýrý. Onyń aıtýynsha, bul aýrý mıllıon adamnyń bireýinde ǵana kezdesedi eken. Ánshi kún saıyn qozǵalysyna kedergi keltiretin spazmdarmen jáne án salǵanda daýys baılamdaryn tolyq paıdalana almaýmen kúresetinin moıyndaǵan.
Parıjdegi konsert kezinde Selın Dıon emosıasyn ustaı almaı, sahnada jylap jiberdi. «Barlyǵymyzdyń birge bolǵanymyz tańǵajaıyp. Men ýáde berdim. Qaıta oralyp, sahnaǵa shyǵamyn dep sóz berdim. Mine, men sizder úshin jáne ózim úshin án salyp turmyn. Qoldaýlaryńyz ben shydamdylyqtaryńyz úshin myń alǵys. Men qandaı bolsam, sondaımyn, óıtkeni sizder meni jaqsy kóresizder», — dedi ánshi.
Dıon sońǵy ret tolyqqandy konsertin 2020 jyly Courage Tour aıasynda bergen edi. 2022 jylǵa josparlanǵan týrnyń Soltústik Amerıka bóligin densaýlyǵyna baılanysty toqtatýǵa májbúr boldy.
Aýrýy týraly málimdegennen bir jyl ótken soń, 2023 jyldyń qarashasynda ánshi alǵash ret kópshilik aldyna shyqty: ony «Monreal Kanadıens» hokeı komandasynyń machynda balalarymen birge kórdi. Al 2024 jyldyń aqpanynda Dıon óziniń mansaby men emdelmeıtin dertimen ómiri týraly derekti fılmniń shyǵatynyn jarıalady.