Semeıdiń shetindegi Vodnyı kentinde qandy qylmys boldy: 19 jastaǵy qyz úıiniń janynda pyshaq jaraqatynan kóz jumdy. Kúdikti ustaldy, dep habarlaıdy infohub.kz saıty.
Kórshiler bolǵan jaǵdaıdy KTK telearnasyna baıandady. Olardyń aıtýynsha, aldymen aıqaı estigen, keıin qanǵa boıalǵan qyzdy kórgen. Janjal eki jas jigittiń arasynda bolǵan degen boljam bar.
«Men aýlada edim. Aıqaı, shý, tóbeles estidim. Qyz aıqaılady. Keıin syrtqa shyqsam, qyz jerde jatyr, bári qan, óńi bozaryp ketken. Júrek massajyn jasady. Jigitter turdy. Jylady», — dedi kýáger Irına Lysak.
Jergilikti turǵyndar jigittiń urys kezinde pyshaqqa jarmasqanyn aıtady. Keıbir derekterge qaraǵanda, ol óltirilgen qyzdyń burynǵy jigiti bolǵan. Kúdikti qylmystan keıin qashýǵa tyrysyp, tipti qorshaýdan sekirip ótken, deıdi kórshiler.
«Keıin bir jigit júgirip kelip, kómek surady. Shyqsam, qyz jatyr, pyshaqtan jaralanǵan. Keıin jedel járdem keldi, polısıa keldi, bizdi úıge qaıtardy», — dedi jergilikti turǵyn Azamat Kýjykenov.
Oqıǵa ornyna kelgen dárigerler zardap shekken qyzdy aman alyp qala almady. Ol qansha pyshaq jaraqatyn alǵany naqtylanbaǵan. Anyqtalǵandaı, óltirilgen qyz jergilikti kolejdiń úshinshi kýrs stýdenti bolǵan. Oqytýshylar qyzdyń tárbıeli ári jaqsy oqyǵanyn atap ótti. Onyń sýreti qurmet taqtasynda ilýli tur. Qaıǵyly oqıǵa bolǵan kúni tańerteń ol sabaqqa kelgen.
Polısıa oqıǵany asa ustamdylyqpen túsindirdi. Kúdiktiniń ustalǵanyn habarlady.
«21 qyrkúıekte polısıa óltirý faktisi boıynsha qylmystyq is qozǵady. Kúdikti anyqtalyp, izin sýytpaı ustaldy. Ol aýdannyń 24 jastaǵy turǵyny bolyp shyqty», — dep naqtylady Semeı qalalyq polısıa basqarmasy bastyǵynyń orynbasary Erjan Aqqalıev.
Kúdikti qazir oqshaýlaǵyshta otyr. Polısıa qurban men kúdiktiniń tanys bolǵanyn habarlady.