Semeıde gazovoz jarylyp, avtokólik jýý ornynyń mańynda órt shyqty. Zardap shekken eki adamnyń biri reanımasıada jatyr. 45 jastaǵy polısıa qyzmetkeriniń jaǵdaıy aýyr, biraq turaqty dep baǵalanyp otyr, dep habarlaıdy infohub.kz saıty.
Semeı jedel medısınalyq járdem aýrýhanasy bólimshesiniń meńgerýshisi Daryn Baqtybaevtyń aıtýynsha, polıseıge ekinshi jáne úshinshi dárejeli kúıik dıagnozy qoıylǵan, denesiniń shamamen 25-30 paıyzy zaqymdanǵan.
«Onyń jaǵdaıy aýyr, biraq turaqty. Ekinshi jáne úshinshi dárejeli kúıik dıagnozy qoıyldy, denesiniń shamamen 25-30 paıyzy zaqymdanǵan. Ekinshi naýqas hırýrgıa bólimshesine jatqyzyldy, onyń jaǵdaıy ortasha aýyr dep baǵalanyp otyr», — dep keltiredi onyń sózin «31 arna».
Ekinshi zardap shekken adam — gazovoz júrgizýshisi. Eki er adam da oqıǵadan keıin aýrýhanaǵa jatqyzyldy.
Jarylys 22 qyrkúıek kúni keshke Sosnovaıa kóshesindegi avtokólik jýý ornynyń mańynda boldy. Aldyn ala derekterge qaraǵanda, gaz-aýa qospasy tutanyp, sońynan gazovoz jarylǵan. Órt bir qabatty avtokólik jýý ǵımaratyn sharpyp, kórshiles eki jeke úıge taraǵan.
Úılerdiń biri tolyǵymen órtenip ketti. Shatyr qulaǵan sátte ishinde adam bolmaǵan. Ekinshi úı ishinara qıraǵan.
Kýágerler telearnaǵa jarylystan keıin adamdardyń jan-jaqqa qasha bastaǵanyn aıtty. Órttiń sebebi anyqtalyp jatyr, saraptama taǵaıyndaldy. Jumys toby keltirilgen shyǵynnyń mólsherin eseptep jatyr.