Semeıde polısıa qyzmetkerleri eki qyzdy — júrgizýshi men avtokólik kapotynda júrgen jolaýshyny ákimshilik jaýapkershilikke tartty, dep habarlaıdy infohub.kz saıty.
Abaı oblysy polısıa departamentiniń resmı Telegram-arnasynda habarlanǵandaı, oqıǵa 14 shildede Qaraǵaıly shaǵyn aýdanynda bolǵan. Áleýmettik jelilerdi monıtorıńteý barysynda tártip saqshylary Toyota RAV4 avtokóliginiń kapotynda jolaýshynyń otyrǵany beınelengen jazbany anyqtady.
Qatysýshylardyń jeke basy jedel anyqtaldy. Rólde 22 jastaǵy qala turǵyny bolǵan. Ol jolaýshyny kólik quralynyń kabınasynan (salonynan) tys tasymaldaǵany úshin ákimshilik jaýapkershilikke tartyldy. Sondaı-aq qozǵalys kezinde avtokóliktiń kapotynda otyrǵan 24 jastaǵy jolaýshy da jol júrisi qaǵıdalaryn buzǵany úshin ákimshilik jaýapkershilikke tartyldy.