«Semeı ormany» memlekettik orman tabıǵı rezervatyndaǵy orman órtin sóndirý jumystary táýlik boıy jalǵasýda. Órt sóndirýshiler ashyq jalyndy joıýǵa qol jetkizdi, dep habarlaıdy infohub.kz saıty.
Ekologıa mınıstrliginiń málimetinshe, 17 shilde saǵat 7:00-degi jaǵdaı boıynsha órtti sóndirýge 769 adam, 191 birlik jerústi tehnıkasy jáne 8 tikushaq jumyldyryldy.
«Barlyq tartylǵan qyzmetterdiń úılesimdi jáne jedel áreketteriniń arqasynda ashyq jalyn sóndirildi, qazirgi ýaqytta jekelegen tutaný oshaqtaryn joıý jumystary júrgizilýde. Tún boıy jeke quram órtti oqshaýlaý jumystaryn jalǵastyrdy», — dedi mınıstrlikte.
Órt sóndirý bastalǵaly beri avıasıa 219 ret sý tógip, órt oshaǵyna 474 tonna sý jetkizildi.
Qazirgi tańda orman órtin oqshaýlaý jáne tolyq joıý jumystary jalǵasýda. Ekologıa mınıstrliginiń málimetinshe, jaǵdaı turaqty baqylaýda.
Buǵan deıin Abaı oblysyndaǵy rezervat aýmaǵynda orman órti bolǵany habarlanǵan bolatyn. Ony sóndirýge jerústi tehnıkasy men avıasıa jumyldyryldy. Órt saldarynan «DosbolLike» lagerinen 190 bala jáne 20 qyzmetker evakýasıalandy. Premer-mınıstr Oljas Bektenov oqıǵa ornyna mınıstrlerdi shuǵyl jiberdi. Aldyńǵy kúni Ekologıa mınıstrligi men TJM órttiń áýeden túsirilgen foto jáne beınejazbalaryn kórsetken edi.