16 shildede Abaı oblysynyń Borodýlıha aýdanynda iri orman órti shyqty. Onyń saldarynan jazǵy lagerden 190 bala evakýasıalandy. Órtti sóndirýdi órt qaýipiniń tótenshe klasy men qatty ystyq qıyndatyp otyr, dep habarlaıdy Orda.kz tilshisi.
Órt ornyna memlekettik orman qorǵaý qyzmeti men TJD qyzmetkerleri jiberildi. Sondaı-aq, Bambi Bucket sý tógetin qurylǵysymen jabdyqtalǵan AS350 tikushaǵy jáne avıasıalyq órt sóndirý qyzmetiniń tórt desantnık attandy. Katon-Qaraǵaı aýylynan «Qazavıaormanqorǵaý» RMK-nyń Mı-8 tikushaǵy ushyp keldi. «Orman órti «Semeı ormany» memlekettik orman tabıǵı rezervatynyń Borodýlıha fılıalynyń Kamyshen ormanshylyǵynyń 57 kvartalynda tirkeldi», — dep habarlady Qazaqstan ekologıa jáne tabıǵı resýrstar mınıstrligi.
Jedel aqparat boıynsha, órt sóndirýge 101 polısıa qyzmetkeri, 25 qyzmettik kólik, onyń ishinde tórt avtobýs jáne eki KamAZ jumyldyryldy. Tikushaqtar sý tógetin qurylǵylar arqyly 24 ret sý shashty. Órt ornyna qosymsha kúsh pen tehnıka jiberilýde.
Abaı oblysy TJD baspasóz qyzmeti Kamyshen ormanshylyǵy aýmaǵynda ornalasqan Dos Bol Like jazǵy lagerinen 190 balanyń evakýasıalanǵanyn rastady. Eki balany ata-anasy alyp ketti, al 188 bala Borodýlıha aýylyna evakýasıalandy.
Eske sala keteıik, 2023 jyly jazda osy rezervat aýmaǵynda Qazaqstan tarıhyndaǵy eń iri orman órti bolyp, 15 adam qaza tapty. Buǵan deıin Stepnogorsk mańynda naızaǵaı soǵýynan egistikterdiń uzaq ýaqyt janǵany habarlanǵan edi.
Materıal Orda.kz saıtynyń málimeti boıynsha daıyndaldy.