Áleýmettik jelilerde Semeıdegi meıramhanalardyń biriniń qyzmetkerleri mekeme jumysynyń toqtatylǵany týraly habarlama jarıalady. Abaı oblysy polısıa departamenti jaǵdaıdy túsindirdi, dep habarlaıdy infohub.kz.
Qyzmetkerlerdiń aıtýynsha, 28 tamyzda olardyń meıramhanasynyń qyzmeti toqtatylǵan. Olar buǵan jetkilikti zańdy negiz bolmaǵanyn aıtady. Mekeme ákimshiligi laýazymdy tulǵalardyń áreketin tekserýdi suraǵan.
Abaı oblysy polısıa departamenti Instagram-paraqshasynda jaǵdaıǵa túsinikteme berdi. Vedomstvo meıramhana qyzmetiniń toqtatylmaǵanyn málimdedi. «Semeı prokýratýrasynyń úılestirýimen sotqa deıingi tergeý organy buzaqylyq faktisi boıynsha tergeý áreketterin júrgizý jáne jaǵdaıdy saqtaý úshin tek oqıǵa ornyna ýaqytsha kirýdi shektedi», — dep habarlady Abaı oblysy PD.
Vedomstvonyń dereginshe, 22 tamyzda tańǵy saǵat 04:00 shamasynda bı alańynda belgisiz er adam eshqandaı sebepsiz Astananyń 37 jastaǵy turǵynynyń betine soqqy jasaǵan. «Soqqydan er adam qulap, uzaq ýaqyt es-tússiz jatqan. Oǵan janyndaǵy kelýshiler kómek kórsetken. Al mekeme ákimshiligi polısıa men jedel járdemdi ýaqytynda shaqyrmaǵan», — dep atap ótti Abaı oblysy PD.
Munda vedomstvo bul mekeme sońǵy kelýshige deıin jumys isteıtinin, alaıda ishinde turaqty lısenzıalanǵan kúzet joq ekenin qosty. «Qalyptasqan jedel jaǵdaıdy eskere otyryp, ákimshilik qabyldap jatqan sharalar qaýipsizdik pen tártiptiń tıisti deńgeıin qamtamasyz etpeıdi, sondyqtan polısıa klýb mańyna qosymsha narád qoıady. Bıylǵy jyldyń basynan beri mekeme ishinde quqyq buzýshylyq týraly 15 habarlama tirkelgen. Eki toptyq tóbeles faktisi boıynsha sotqa deıingi tergeý júrgizilýde», — dep túsindirdi vedomstvoda.
Polısıa «Tutynýshylardyń quqyqtaryn qorǵaý týraly» QR Zańynyń 11 jáne 24-baptaryna sáıkes oıyn-saýyq mekemeleriniń ıeleri men basshylary kelýshilerge qaýipsiz jaǵdaı jasaýǵa mindetti ekenin eske saldy. Mekemede janjaldar men basqa da quqyq buzýshylyqtardyń aldyn alatyn jáne jolyn kesetin tıisti kúzet uıymdastyrylýy tıis. Kez kelgen oqıǵa týraly ákimshilik dereý polısıaǵa habarlaýǵa, al zardap shekkender bolsa, jedel járdem shaqyrýǵa mindetti.
«Árbir kelýshi qaýipsiz demalysqa quqyly. Kórsetiletin qyzmetterdiń qaýipsizdigin qamtamasyz etý mekeme ákimshiliginiń mindeti», — dedi quqyq qorǵaý organdarynyń ókilderi.