Reseılik jýrnalıs, mýzyka synshysy ári telejúrgizýshi Sergeı Sosedov 59 jasynda ómirden ótti. Onyń qaıtys bolýyna gаstróldegi jazataıym oqıǵa sebep boldy — ártis baspaldaqtan qulap ketken, dep habarlaıdy infohub.kz saıty.
Sosedovtyń qaıtys bolǵany týraly «SHOT» Telegram-arnasy habarlady. Onyń dereginshe, qaıǵyly oqıǵa gаstróldik sapar kezinde bolǵan.
Qarsańynda Sergeı Sosedov Iakýtıanyń Nerúngrı qalasyna kelgen. Onda ol «Jemchýjına Dalnego Vostoka» halyqaralyq sulýlyq jáne sán baıqaýynyń qazylar alqasyna kirýi tıis edi. Baıqaýdyń fınaly 25 qyrkúıekke belgilengen bolatyn.
Sosedovtyń áriptesi Vadım Takmenev Instagram-da bylaı dep jazdy: «Barlyǵymyz shoktamyz. Búgin tańerteń dosymyz, komandamyzdyń ajyramas bóligi, «Sýperstar» jobasynyń júregi, jany, qozǵaýshy kúshi Sergeı Sosedov aramyzdan ketti. Biz osy senbide bárimiz jınalyp, «VIA SÝPERSTAR» jańa maýsymynyń birinshi shyǵarylymyn birge kórýimiz kerek edi. Ol bul kezdesýdi de, bul premerany da asyǵa kútken. Osy maýsymnyń barlyǵy onyń esteligine arnalady. Ol týraly — ashyq, ádil, qyńyr, meıirimdi, jumsaq, jarqyn jáne shynaıy! Bul onyń sońǵy túsirilimi edi. Endi biz birge ótkizgen sońǵy mınýttardy, kúnder men aptalardy este qaldyrý úshin ár kadrǵa úńilemiz».
«Gazeta.rý» habarlaǵandaı, Sergeı Sosedov Reseıde 1990-jyldardyń sońy men 2000-jyldardyń basynda «Akýly pera» mýzykalyq jobasynyń eń ótkir jáne epatajdy qazylarynyń biri retinde keńinen tanymal boldy.
2020 jyldan bastap ol «Sýperstar! Vozvrashenıe» shoýynyń turaqty qazylar alqasynyń quramynda boldy. Sonymen qatar Sosedov «Za granú» jobasynyń júrgizýshisi bolyp, «X-Faktor Belarýs» shoýyna qazylar alqasynyń múshesi retinde qatysty.