Ońtústik Koreıa astanasyndaǵy qurylys alańynda qaıǵyly oqıǵa boldy: beton tóbeniń bir bóligi qulap, Qazaqstan azamaty qaza tapty. Azamattyń qaza tapqanyn Qazaqstan Syrtqy ister mınıstrligi rastady, dep habarlaıdy infohub.kz saıty.
Yonhap agenttiginiń málimetinshe, seısenbi kúni Seýldiń ońtústik bóligindegi kóppáterli turǵyn úı qurylysynda beton tóbeniń bir bóligi qulap, qazaqstandyq jumysshy qaza tapqan.
Ońtústik Koreıa Eńbek mınıstrliginiń dereginshe, 30 shamasyndaǵy er adam ǵımarattyń 23-qabatyndaǵy páterlerdiń birinde tazalaý jumysynyń bastalýyn kútip turǵan. Tańǵy 9:45 shamasynda beton tóbeniń bir bóligi qulap, ony soqqan.
Vedomstvonyń habarlaýynsha, eldiń Eńbek mınıstrligi nysandaǵy jumysty dereý toqtatyp, polısıamen jáne qurylys qaýipsizdigin qamtamasyz etetin organdarmen birlesip oqıǵany tergeýdi bastady.
Polısıa men Eńbek mınıstrligi apattyń sebepterin anyqtap, oǵan qatysqan kompanıalardyń eńbek qaýipsizdigi týraly zańdardy buzǵanyn ne buzbaǵanyn anyqtaýdy kózdep otyr.
Qazaqstan Syrtqy ister mınıstrligi NUR.KZ tilshisine elimizdiń azamatynyń qaza tapqanyn rastady. «Syrtqy ister mınıstrligi Seýlde qurylysta bolǵan jazataıym oqıǵa saldarynan Qazaqstan Respýblıkasy azamatynyń qaza tapqanyn rastaıdy. Koreıa Respýblıkasynyń quzyretti organdary oqıǵany tergeýdi bastady. Qazaqstandyq dıplomattar qaza tapqan azamattyń týystarymen baılanys ornatyp, olarǵa konsýldyq-quqyqtyq kómek kórsetýde», — delingen habarlamada.