Samarqandta ótip jatqan 46-shy Dúnıejúzilik shahmat olımpıadasynyń onynshy týrynda Qazaqstan áıelder quramasy Fransıany 2,5:1,5 esebimen jeńdi. Sońǵy týr aldynda qazaqstandyq shahmatshy qyzdar Qytaı quramasynan bir upaı qalyp, ekinshi orynda tur, dep habarlaıdy infohub.kz saıty.
Qatarynan úsh teń oıyn komandamyzdyń medal úshin kúresin qıyndatqanymen, qyzdar tabandy kúreste fransıalyqtardan basym tústi. Sheshýshi upaıdy tórtinshi taqtada Elnaz Kalıahmet ákeldi: qara taspen oınaǵan jas shahmatshy 101-shi júriste Paýlın Gıshardyń saǵatyn toqtatqyzdy.
Kalıahmettiń jeńisi komandaǵa aýadaı qajet edi. Bıbısara Asaýbaeva utyp, Merýert Kamalıdenova jeńilip, Alýa Nýrman teń oınaǵan soń, kezekti — qatarynan tórtinshi — teń oıynnyń kóleńkesi anyq kóringen. Abyroı bolǵanda, Kalıahmet teń pozısıany buzyp, oıyn sońynda qyńyr qarsylasyn tize búktirdi.
Kósh bastap turǵan Qytaı Olımpıadada ekinshi upaıyn joǵaltty. Alǵashqy teń oıyn Qazaqstanmen machta, ekinshisi ótken týrda Úndistanmen boldy. Úndistannyń súrinýiniń arqasynda Qazaqstan kestede onymen qaıta oryn aýystyrdy. Sońǵy týr aldynda qyzdarymyz — ekinshi orynda.
DÚNIEJÚZİLİK SHAHMAT OLIMPIADASY-2026
10-shy týr. 26 qyrkúıek. Áıelder
QAZAQSTAN – FRANSIA 2,5:1,5
♟️ GM* Bıbısara Asaýbaeva (2536) – IM Deımante Daýlıte-Kornett (2391) 1:0
♟️ GM Marı Sebag (2401) – IM Alýa Nýrman (2455) 0,5:0,5
♟️ IM Merýert Kamalıdenova (2413) – IM Sofı Mıle (2358) 0:1
♟️ IM Paýlın Gıshar (2344) – WIM Elnaz Kalıahmet (2347) 0:1
* GM – grosmeıster, IM – halyqaralyq sheber, WIM – áıelder arasyndaǵy halyqaralyq sheber
Qazaqstannyń erler quramasy Túrikmenstandy 3:1 esebimen jeńip, 33-shi orynnan 24-shi orynǵa kóterildi. Onyń ústine alǵashqy ondyqtan qalysýy nebári bir upaı.
Al kósh bastap turǵan Ózbekstan-1 quramasy sońǵy týr aldynda Armenıany 3,5:0,5 esebimen jeńdi.
DÚNIEJÚZİLİK SHAHMAT OLIMPIADASY-2026
10-shy týr. 26 qyrkúıek. Erler
QAZAQSTAN – TÚRİKMENSTAN 3:1
♟️ GM* Denıs Mahnev (2568) – GM Saparmýrat Atabaev (2503) 0,5:0,5
♟️ GM Meılıs Annaberdyev (2384) – IM Saýat Nýrgalıev (2493) 0:1
♟️ GM Ansat Aldıar (2495) – FM Amanmýhammet Hommadov (2389) 0,5:0,5
♟️ Shahrýh Týraev (2222) – GM Jandos Agmanov (2490) 0:1
* GM – grosmeıster, IM – halyqaralyq sheber
Samarqandtaǵy 46-shy Dúnıejúzilik shahmat olımpıadasyna 398 komanda, 1974 shahmatshy, 240 grosmeıster qatysyp jatyr.
Týrnır shveısarıalyq júıemen 11 týrda ótedi. Ár komandanyń quramynda 4 oıynshy jáne 1 qosalqy bar. Ýaqyt baqylaýy klasıkalyq – alǵashqy 40 júriske 90 mınýt, oǵan qosa taǵy 30 mınýt. Ár júristen keıin 30 sekýnd qosylady.
Machta jeńgen qurama eki komandalyq upaı, teń oınaǵanda bir upaı alady. Upaılar teń bolǵan jaǵdaıda qosymsha kórsetkishter kúshine enedi.
Erler týrnıriniń jeńimpazdaryna lord Frederık Gýstavýs Gamılton-Rassel kýbogy, áıelder týrnıriniń jeńimpazdaryna Vera Menchık kýbogy tabystalady. Eki komandasynyń oryndarynyń eń az qosyndysy boıynsha úzdik shyqqan federasıa Nona Gaprındashvılı kýbogymen marapattalady.