Samarqandta ótip jatqan 46-shy Álemdik shahmat olımpıadasynda Qazaqstannyń áıelder quramasy týrnır aıaqtalýǵa eki týr qalǵanda jalpy esepte úshinshi oryndy saqtap tur, dep habarlaıdy infohub.kz saıty.
Toǵyzynshy týrda qazaqstandyq shahmatshy qyzdar Mońǵolıa quramasymen kezdesti. Tartys 2:2 esebimen teń aıaqtaldy. Bıbısara Asaýbaeva men Alýa Nurman óz partıalarynda jeńiske jetti, al Merýert Kamalıdenova men Zarına Nurǵalıeva qarsylastaryna jol berdi.
Bul teń nátıje Qazaqstannyń áıelder quramasy úshin qatarynan úshinshi boldy. Ulttyq komandanyń enshisinde qazir 15 upaı bar. Ol qosymsha kórsetkishter boıynsha Úndistannan qalyp, Armenıany basyp ozǵan úshinshi orynda tur. Týrnır kestesinde 17 upaı jınaǵan Qytaı quramasy kósh bastap tur.
Qazaqstannyń erler quramasy da toǵyzynshy týrda teń oınady — Polsha quramasymen 2:2. Denıs Mahnóv pen Saýat Nurǵalıevtiń partıalary teń aıaqtaldy, Aldıar Ansat óz taqtasynda jeńiske jetti, al Danıal Sapenov jeńilis tapty.
12 upaımen Qazaqstannyń erler quramasy jalpy esepte 33-shi orynda. 16 upaımen Ózbekstan komandasy kósh bastap tur.
Álemdik shahmat olımpıadasynyń qorytyndy týrlary 26 jáne 27 qyrkúıekte ótedi.