Álemge áıgili ánshi Shakıranyń Bishkekte jeke konsert berýi múmkin degen jańalyq Qyrǵyzstan turǵyndaryn dúr silkindirdi, dep habarlaıdy infohub.kz.
Búgin Qyrǵyzstan prezıdentiniń is basqarýshysy Qanybek Tumanbaev Shakıranyń jaqyn arada Bishkekte jeke konsert berýi múmkin ekenin málimdedi. Ol ánshiniń vıdeosyn jarıalady. Bul aqparatqa Qyrǵyzstan turǵyndary birden ún qatty.
Jeli qoldanýshylary tańdanys pen taǵatsyzdyqtaryn bildirdi: «Kútemiz!», «Qyzymmen birge mindetti túrde baramyn», «Bul keremet!», «Shakıradan keıin Backstreet Boys-ti kútemiz», «Mıllenıaldardyń praımy. Dınozavrlar, daıyndalyńdar», «BTS tobyn da kútemiz», «Oǵan konsertine ushpaǵan jaǵdaı, ol ózi bizge ushyp keledi».
Vesti.kg basylymynyń jazýynsha, álemdik juldyzdyń óner kórsetýi qarasha aıyna josparlanǵan. Konsert 51 myń kórermenge arnalǵan jańa «Bishkek Arena» stadıonynda ótedi. 31 tamyzda VI Dúnıejúzilik kóshpendiler oıyndarynyń ashylý saltanatynda bul jerde amerıkalyq ánshi Nıkol Sherzınger óner kórsetken bolatyn.
Prezıdent is basqarmasynda qazirgi ýaqytta taraptar Shakıranyń konsertin uıymdastyrý sharttary men naqty kúnin talqylap jatqanyn naqtylady. Buǵan deıin álemdik juldyz Enrıke Iglesıas Astana men Almatyda óner kórsetip, konsertterden keıin emosıonaldy jazbalar jarıalap, jankúıerlerine alǵys bildirgeni habarlanǵan.