Aqtóbe oblysynyń qylmystyq ister jónindegi mamandandyrylǵan aýdanaralyq soty Shalqarda «aýdan aýdanǵa» qarsy jappaı tóbeles kezinde 17 jastaǵy jigitti óltirgen is boıynsha úkim shyǵardy, dep habarlaıdy infohub.kz saıty.
Qylmys jasalǵan kezde sottalýshy kámeletke tolmaǵandyqtan, oǵan ortasha qaýipsizdik mekemesinde jazasyn óteı otyryp, 9 jylǵa bas bostandyǵynan aıyrý jazasy taǵaıyndaldy.
Sottalǵan adam marqumnyń ata-anasyna moraldyq zıan úshin 15 mln teńgeden, sondaı-aq materıaldyq shyǵyn men advokat qyzmetine jumsalǵan shyǵystar úshin 2 mln teńgeden astam qarajat tóleýge mindetteldi.
Sonymen qatar sot Aqtóbe oblysy polısıa departamentiniń atyna jeke uıǵarym shyǵardy. Onda Shalqar aýdanynyń polısıa qyzmetkerleri kámeletke tolmaǵandar arasyndaǵy qylmystyń aldyn alýmen aınalyspaǵany, bul osyndaı saldarǵa ákep soqqany kórsetilgen.
Úkim ázirge zańdy kúshine engen joq.
Eske salaıyq, jastardyń toptyq tóbelesi osy jyldyń 20 naýryzyna qaraǵan túni Shalqarda bolyp, saldarynan 17 jastaǵy jasóspirim qaza tapqan. Keıin qaza bolǵan jasóspirim bir jyl buryn mektepti bitirip, áskerge barýǵa daıyndalyp júrgeni belgili boldy. Sondaı-aq marqumnyń ákesi de shaǵymdanǵan.
Qyrkúıekte Aqtóbede osy qylmysqa aıyptalǵan stýdentke sot bastaldy. Prokýror oǵan 8 jylǵa bas bostandyǵynan aıyrýdy suraǵan edi.