Astanada avarıalyq barak turǵyndary eski turǵyn úıdi renovasıalaý baǵdarlamasy boıynsha kóshirý kezinde qıyndyqqa tap boldy. Sebep — sharshy metrge qatysty kelispeýshilik, dep habarlaıdy infohub.kz saıty.

Telearnanyń dereginshe, 2021 jyly Gersen kóshesi, 2A mekenjaıyndaǵy barak avarıalyq dep tanylǵan. Renovasıa baǵdarlamasy boıynsha úıdi buzý jáne turǵyndardy kóshirý kezegi bıyl ǵana keldi. Alaıda kópten kútken kiltterdiń ornyna eki otbasy komısıadan bas tartý aldy. Turǵyndar óz páterlerine qosymsha bólmeler salyp, turǵyn alańnyń ulǵaıǵanyn zańdy túrde tirkegenderin aıtady. Biraq kóshirý kezinde ákimdik jańa sharshy metr boıynsha jańa páter berýden bas tartty. Onyń ornyna tek bastapqy alańǵa sáıkes turǵyn úı usynyp otyr, ol 5 ese az.

Mysaly, menshik ıeleriniń biri 300 sharshy metr esebinen turǵyn úı berýdi suraıdy, biraq sheneýnikter tek bastapqy 54 sharshyny ǵana eskeredi. Er adam 13 jyl boıy bala tárbıelep, úıdi salyp, barlyq qujattardy HQKO arqyly adal rásimdegenin aıtady.

«Biz kelispeımiz, barlyq jerge shaǵym jazamyz. Sebebi bizde 2-nysan boıynsha 300 sharshy metr shyǵady. Al olar eskisi boıynsha, úıdi satyp alǵanda 54 sharshy bolǵan dep aıtady. Al biz zańdastyrǵan, salǵan qosymshalarymyzdy múlde esepke almaıdy. Biraq bizde barlyq qujat bar, bári zańdy», — dep ashýlandy Astana turǵyny Mereke Nazyrov.

Turǵyndar zańsyz áreket týraly sóz bolmaıtynyn, úıge eshqandaı aýyrtpalyq tirkelmegenin aıtady. Sonymen qatar, qalalyq turǵyn úı basqarmasy páterdegi qosymsha qurylystardy bıyl ǵana, kóshirý qarsańynda rásimdegenderin túsindiredi. Biraq úı resmı túrde 5 jyl buryn avarıalyq dep tanylǵandyqtan, zań onda kez kelgen qaıta qurý men keńeıtýge tyıym salady.

«Qazirgi jaǵdaıda avarıalyq úı turǵyndary zańsyz qosymsha qurylystar salyp, olardy zańdastyratyn kóptegen jaǵdaılar anyqtaldy. Osy baǵdarlama aıasynda avarıalyq úılerdegi óz betinshe salynǵan qosymsha qurylystardy zańdastyrýǵa zańnama jol bermeıdi», — dep túsindirdi Astana turǵyn úı jáne turǵyn úı ınspeksıasy basqarmasynyń bas mamany Raıhan Djoldınova.

Qazir qala bıligi men turǵyndardyń ózi avarıalyq baraktaǵy qosymsha qurylystardyń zańdylyǵy týraly daýǵa núkte qoıý úshin sot prosesterine daıyndalýda.