Qazaqstannyń Densaýlyq saqtaý mınıstrligi azamattardy emdeý bastalmaı turyp sheteldik medısınalyq ortalyqtardy muqıat tekserýge shaqyrdy. Vedomstvo qandaı krıterılerge birinshi kezekte nazar aýdarý kerektigin aıtyp, táýekelderden saqtanýǵa kómektesetin keńester berdi, dep habarlaıdy infohub.kz saıty.
Kez kelgen sheteldik medısınalyq ortalyqqa júginbes buryn, ol týraly barlyq qoljetimdi aqparatty zerdeleý, akredıtasıasynyń bar-joǵyn tekserý, dárigerlerdiń tájirıbesi men usynylatyn jaǵdaılarǵa kóz jetkizý qajet. Atap aıtqanda, kelesi krıterılerdi basshylyqqa alý usynylady: klınıkanyń halyqaralyq akredıtasıasynyń bolýy (JCI, ISO jáne t.b.); dárigerlerdiń biliktiligi jáne qajetti em túrlerin júrgizý tájirıbesi; dıagnostıka men terapıanyń dáleldi ádisterin qoldaný; em quny, kezeńderi jáne yqtımal nátıjeler týraly aqparattyń ashyqtyǵy; medısınalyq uıym qyzmetiniń resmı rastalýy.
«Azamattarǵa tolyq saýyǵýdy ýáde etetin, tekserilmegen emdeý ádisterin usynatyn nemese tolyq konsýltasıa men medısınalyq qujattardy taldaýsyz sheshim qabyldaýdy talap etetin usynystarǵa saqtyqpen qaraý kerek», – delingen habarlamada.
Densaýlyq saqtaý mınıstrliginde belgilengen sapa men qaýipsizdik krıterılerine sáıkes keletin sheteldik medısınalyq klınıkalar tizimi qazaqstandyqtardy búdjet qarajaty esebinen shetelde emdelýge jiberý kezinde qoldanylatynyn túsindirdi. Vedomstvo bul aqparat shetelde kómek alý úshin medısınalyq uıymdy óz betinshe tańdaıtyn pasıentterge paıdaly bolýy múmkin ekenin atap ótti.
75 klınıkany qamtıtyn tizimmen silteme arqyly tanysýǵa bolady. Tizimde Reseı, Belarýs, Ońtústik Koreıa, BAÁ, Germanıa, Úndistan, Túrkıa, Ýkraına, Ispanıa jáne Serbıada ornalasqan medısınalyq ortalyqtar usynylǵan.
Buǵan deıin «Kýrsıv» júrekti shetelde emdeý 20 mln teńgege deıin jetýi múmkin ekenin jazǵan bolatyn.