Qazaqstandyq tenısshi Aleksandr Shevchenko (álemdik reıtıńte 100-oryn) bir kúnde eki jeńiske qol jetkizip, Kásibı tenısshiler qaýymdastyǵynyń (ATP) 250 sanatyndaǵy Swiss Open Gstaad-2026 týrnıriniń jartylaı fınalyna shyqty, dep habarlaıdy infohub.kz.
Aldymen Shevchenko keshe jańbyrǵa baılanysty úzilgen shveısarıalyq Domınık Shtrıkermen (360) kezdesýdi 7:6 (7:5), 6:2 esebimen aıaqtady. Sodan keıin shırek fınalda fransýz Kenten Alısti (90) 7:6 (7:5), 6:3 esebimen utty. Oıyn 1 saǵat 37 mınýtqa sozyldy. Shevchenko eıster boıynsha qarsylasynan qalys qaldy (4:7), biraq breıkterde (1:0) jáne jalpy jınaǵan upaılarda (75:64) basym tústi.
Odan bir kún buryn Alıs Qazaqstannyń birinshi raketkasy Aleksandr Býblıkti (11) 6:7 (4:7), 6:4, 7:6 (7:5) esebimen jeńdi. Osylaısha Býblık ótken jylǵy tıtýlyn qorǵaı almady. Degenmen, kýbok basqa bir qazaqstandyqqa buıyrýy múmkin. Shevchenkonyń jartylaı fınaldaǵy qarsylasy keıin anyqtalady.
Swiss Open Gstaad týrnıri — Shveısarıanyń tenısten ashyq chempıonaty — 1915 jyldan beri ótkizilip keledi. 1967 jylǵa deıin ol ártúrli qalalarda ótti, al 1968 jyldan bastap turaqty orny — Shveısarıa Alpisindegi tanymal taý shańǵysy kýrorty Gshtaad. Bul Eýropadaǵy eń bıik taýly ATP týrnıri sanalady (teńiz deńgeıinen 1050 metr). 2009 jyldan bastap týrnır ATP-250 sanatyna jatady. Jalpy júlde qory 612,5 myń eýrony quraıdy.
Ár jyldary Swiss Open Gstaad týrnırinde shveısarıalyq Rodjer Federer, reseılik Evgenı Kafelnıkov, shved Stefan Edberg, argentınalyq Gılermo Vılás jáne basqa da juldyzdar jeńiske jetken.