«Shın-Laın» toby men Ońtústik Koreıanyń iri logıstıkalyq kompanıasy Lotte Global Logistics birlesken kásiporyn qurý týraly ózara túsinistik memorandýmyna qol qoıdy. Bastapqy kezeńdegi ınvestısıa kólemi shamamen 1 mlrd teńgege baǵalanyp otyr. Jańa kompanıa saýda jelileri men ınternet-dúkenderge taýar jetkizý qyzmetin kórsetedi, dep habarlaıdy infohub.kz saıty.
Qujat 15 qyrkúıekte Seýlde qol qoıyldy. Birlesken kásiporyn Shin-Line Lotte Global Logistics dep atalady. Ondaǵy Lotte Global Logistics úlesi 51%, «Shın-Laın» úlesi 49% bolady.
Kompanıa 3PL-operator retinde jumys isteıdi, ıaǵnı bızneske logıstıkalyq qyzmetterdiń tolyq keshenin usynady: taýarlardy saqtaý, tasymaldaý, tańbalaý jáne satyp alýshyǵa jetkizý. Jańa operator saýda jelilerine, dıskaýnter dúkenderge jáne onlaın-dúkenderge qyzmet kórsetedi. Qyzmetter «Shın-Laın» kompanıalar tobynyń ózine de, úshinshi tarap klıentterine de kórsetiledi.
«Shın-Laın» kompanıany júk aǵyndarymen jáne dıstrıbýsıamen qamtamasyz etip, oǵan qoıma qýattary men avtokólikti beredi. Lotte Global Logistics óz kezeginde halyqaralyq logıstıkalyq tájirıbe men ozyq IT-basqarý júıelerin tartady.
Birlesken kásiporyn qurýdy 2026 jyly aıaqtaý josparlanyp otyr. 2027 jyly taraptar onyń jumysyn jolǵa qoımaq, al 2028–2031 jyldary 3PL-qyzmetter naryǵyndaǵy qatysýyn keńeıtedi. Kompanıa eń aldymen Almaty, Astana, Shymkent, Qaraǵandy jáne Qazaqstannyń basqa da óńirlerinde qyzmetin damytýdy josparlap otyr.
Jobany daıyndaý úshin 40 mamannan turatyn jumys toby quryldy — ár taraptan 20 adamnan. Lotte Global Logistics «Shın-Laın» komandasymen birlesip jobany ázirleýge jaýapty.
Taraptar jumystyń aralyq qorytyndysyn qyrkúıekte talqylaýdy josparlap otyr. Qarjylyq kórsetkishter men birlesken kásiporyn qurý jospary bar qorytyndy esep 2026 jyldyń qazanynda kútiledi.
Lotte Global Logistics — Ońtústik Koreıanyń iri konglomerattarynyń biri Lotte Group quramyna kiretin halyqaralyq logıstıkalyq operator. Kompanıa jetkizý tizbegin basqarý salasynda qyzmetterdiń tolyq keshenin usynady.
Aıta keteıik, «Shın-Laın» sondaı-aq Qazaqstanda koreı tehnologıalary boıynsha balmuzdaq óndirýdi bastaý týraly kelisimge kelgen. Sonymen qatar kompanıa koreıdiń Hyundae Hospital klınıkasymen birge Almatyda ońtústikkoreı standarttaryna saı kópbeıindi aýrýhana salǵysy keledi.
«Shın-Laın» qazaqstandyqtarǵa balmuzdaq óndirýshi retinde tanymal. Ol 1995 jyly qurylǵan. Onyń brendteri qatarynda «Mıshka na polúse» plombıry, «Snegovık» jáne «Belochka» eskımostary, «Bomba» balmuzdaǵy, «Djýsıkı» jemis muzy jáne basqalary bar. «Shın-Laın» quryltaıshylary — Andreı men Natalá Shın.