Neuralink kompanıasynyń top-menedjeri Shıvon Zılıs mıllıarder Ilon Maskpen ajyrasqanyn kópshilikke jarıalady. Ol bul týraly H áleýmettik jelisinde habarlap, bul sheshimdi Masktyń ózi qabyldaǵanyn atap ótti, dep jazady infohub.kz saıty.
Ol ajyrasýdan qatty qınalyp júrgenin, biraq tórt ortaq balasy úshin mıllıardermen dostyq qarym-qatynasty saqtap qalýǵa úmittenetinin moıyndady.
«Ilonǵa tereń túsinistik, qamqorlyq jáne tynysh, názik ári senimdi mahabbat degenniń ne ekenin kórsete alǵanyma qýanyshtymyn. Onyń erte jyldaryndaǵy qıyn jaǵdaılardy, jıi tolqyǵan jan dúnıesin jáne adamzat úshin qanshalyqty janqıarlyqpen kúresetinin eskersek, onyń osy álemdegi eń tereń ári berik mahabbatty sezingenin qaladym», — dep jazdy ol.
Shıvon Zılıs olardyń qarym-qatynasy mıllıarderdiń ómirinde jaqsy iz qaldyrdy dep úmittenetinin aıtty, óıtkeni olardyń otbasy mıllıarder úshin árqashan shynaıy qýanyshpen qarsy alatyn tynysh aılaq boldy.
«Men ony ómirden de artyq súıdim, ol maǵan júz ómirge jeterlik bilim berdi jáne ómirime tereń maǵyna syılady. Árıne, joǵaltýdyń azaby aýyr, biraq baqytymyzǵa oraı, bizde tórt keremet sábı bar — olar meniń ómirimdegi basty mahabbatym», — dep qorytyndylady ol.
Buǵan deıin Ilon Mask AQSh prezıdenti Donald Tramp ákimshiligimen keńesshi retinde jumysyn jalǵastyratyny belgili boldy. Ol Pentagonnyń bolashaq soǵystardy zertteý jobasynyń jetekshileriniń biri bolady.
Eske salaıyq, 2025 jyldyń naýryzynda Zılıs Masktan tórtinshi balasynyń dúnıege kelgenin habarlaǵan. Mıllıarderdiń barlyǵy 14 balasy bar.