Shyǵys Qazaqstan oblysynda ınvestısıa kólemi keminde 110 mlrd teńge bolatyn avtomobıl jasaý keshenin salý josparlanyp otyr. Jobaǵa qytaı ınvestorlary qatysady, al kásiporynnyń qýaty jylyna 80 myń avtomobılge jetedi, dep habarlaıdy infohub.kz saıty.
Tıisti kelisimdi «Qazaqstan – Qytaı» ınvestısıalyq forýmy barysynda Shyǵys Qazaqstan oblysynyń ákimi East Motors Corporation kompanıasymen jasady. Qujat jeńil avtomobılder, arnaıy tehnıka jáne zamanaýı qozǵaltqyshtar shyǵaratyn keshen salýdy kózdeıdi.
Joba iri toraptyq (DKD/SKD) qurastyrýdan bastap, usaq toraptyq (CKD) qurastyrýǵa kezeń-kezeńimen kóshýdi, dánekerleý jáne boıaý óndiristerin damytýdy jáne jergilikti qamtý deńgeıin arttyrýdy qamtıdy. Jobalyq qýatqa shyqqan soń óndiris kólemi jylyna 80 myń avtomobılge deıin jetedi. Jergilikti qamtýdy 50%-ǵa jetkizip, odan ári ulǵaıtý josparlanýda.
Jeńil avtomobılder óndirý úshin ınvestor quny 77,85 mlrd teńge bolatyn qýattardy quryp, jylyna keminde 25 myń mashına shyǵarýy tıis. Taǵy 8,65 mlrd teńge qosymsha negizgi quraldarǵa qarastyrylǵan. Óndiris dánekerleý, óńdeý, boıaý jáne shanaqtardy qurastyrýdy qamtıdy.
Júk avtomobılderi, tartqyshtar jáne arnaıy tehnıka úshin óndiristik aktıvterdiń kólemi keminde 15,14 mlrd teńge, al qýaty jylyna 10 myń birlikten kem bolmaýy kerek. Kásiporynda dánekerleý, boıaý jáne qurastyrý, sondaı-aq shanaqtar, kabınalar men jabdyqtar óndirisi josparlanýda.
Jalpy ınvestısıa kólemi keminde 110 mlrd teńge bolýy tıis. Zaýytta shyǵarylǵan avtomobılderdi EAEO memleketterine, Ortalyq Azıa elderine jáne basqa da shetel naryqtaryna eksporttaý josparlanýda.
Jobany East Motors Corporation kompanıasy júzege asyrady. Adata derekterine sáıkes, ol qytaılyq Dongfeng avtokonsernimen baılanysy bolýy múmkin Dong Feng Kazakhstan, sondaı-aq Tricar Motors kompanıalaryna tıesili. Sońǵysynyń ıeleri – Serik Ájimuratov, Qaraqat Muhamadıeva, Dmıtrı Nesterov, sondaı-aq basqa kompanıa arqyly Serikjan Baıahmetov pen Janna Shakenova.
Buǵan deıin Óskemende burynǵy «Azıa Avto» avtozaýytynyń alańynda jańa óndiris iske qosylýy talqylanyp jatqany habarlanǵan. Jobanyń yqtımal qatysýshylarynyń qatarynda qytaılyq Dongfeng Motor Corporation bar.