Óskemendegi Ana men bala ortalyǵynda jyl sońyna deıin Remebot RM-200 robotty júıesi ornatylady. Bul júıe joǵary dáldiktegi neırohırýrgıalyq operasıalardy júrgizýge arnalǵan. Jańa jabdyq Shyǵys Qazaqstan, Abaı jáne Pavlodar oblystarynyń balalaryna kórsetiletin kómek aıasyn keńeıtýge múmkindik beredi, dep habarlaıdy infohub.kz saıty.
Quny 433 mln teńgeden asatyn jabdyqtyń bir danasyn alýǵa sertıfıkatty «Samuryq-Qazyna» AQ basqarma tóraǵasy Nurlan Jaqypov SHQO-ǵa jumys sapary barysynda Ortalyqqa tabys etti. Jabdyq kompanıalar tobynyń qaıyrymdylyq qyzmeti aıasynda Samruk-Kazyna Trust qory arqyly satyp alynýda.
Qazirgi ýaqytta Ortalyq úsh óńirdiń balalaryna mamandandyrylǵan neırohırýrgıalyq kómek kórsetip keledi. 22 tósekke arnalǵan bólimshede josparly jáne shuǵyl operasıalar jasalady. Sońǵy úsh jylda munda aýyr epılepsıa túrlerin VNS-terapıany qoldaný arqyly hırýrgıalyq emdeý de júrgizilýde — 33 operasıa jasalǵan.
Qyzmettiń damýyndaǵy jańa kezeń robotty neırohırýrgıany engizýmen baılanysty. Remebot RM-200 mıdyń úsh ólshemdi modelin jasaýǵa, operasıany aldyn ala josparlaýǵa jáne hırýrgıalyq aspaptyń traektorıasyn sýbmıllımetrlik dáldikpen belgileýge múmkindik beredi. Onyń kómegimen farmakorezıstentti epılepsıa kezindegi operasıalar, isikterdiń az ınvazıvti bıopsıasy jáne basqa da kúrdeli aralasýlar júrgiziledi dep josparlanýda.
«Bizdiń óńir úshin balalar neırohırýrgıasynyń damýy erekshe mańyzǵa ıe. Búginde Ortalyq mamandary úsh oblystyń balalaryna kómek kórsetip, kúrdeli operasıalar jasap, zamanaýı emdeý ádisterin damytýda. Jańa jabdyq bul múmkindikterdi keńeıtip, buryn bizdiń óńirde qoljetimsiz bolǵan tehnologıalardy engizýge jol ashady. Bizdiń mindetimiz — medısınalyq ınfraqurylymdy júıeli túrde damytý, mekemelerdi zamanaýı jabdyqtarmen jaraqtandyrý jáne dárigerlerdiń kásibı ósýine jaǵdaı jasaý. Shyǵys Qazaqstan, Abaı jáne Pavlodar oblystarynyń balalary qajetti joǵary tehnologıalyq kómekti dál osynda, Óskemende ala alýy mańyzdy», — dedi Shyǵys Qazaqstan oblysynyń ákimi Nurymbet Saktaǵanov.
Ana men bala ortalyǵynyń damýy oblys ákimdiginiń, densaýlyq saqtaý júıesiniń, medısınalyq mekemeniń jáne seriktesterdiń qatysýymen jalǵasýda. «Samuryq-Qazyna» AQ-nyń Remebot júıesin engizýi kúrdeli neırohırýrgıalyq operasıalardyń balalarǵa tikeleı óńirde qoljetimdi bolýyna jasalǵan taǵy bir qadam bolmaq.