Shyǵys Qazaqstan oblysyndaǵy Qaraǵujy ózeni «apelsın» túske boıaldy. Sebep — «Vostoksvetmet» JSHS-niń burynǵy Iýbıleınyı-Snegırıha kenishiniń shahta sýlary. Bul jerde buzýshylyqtar anyqtalǵan, dep habarlaıdy infohub.kz.
Ózenniń túsi ózgergennen keıin ekologıa departamenti 31 shildede tekserý júrgizdi. Mamandar kenish aýmaǵynan jer astynan shyǵyp jatqan shahta sýlary jınalyp, Qaraǵujyǵa quıatyn bulaqqa túsetinin anyqtady.
«Tekserý barysynda kenishti joıý jumystarynyń tıisti deńgeıde uıymdastyrylmaǵany anyqtaldy. Sonyń saldarynan jer astynan jer betine shahta sýlarynyń kóptep aǵyp shyǵýy baıqaldy», — delingen habarlamada.
Bul sýlardyń ózenge quıylýy onyń kórsetkishteriniń ózgerýine ákeldi. «Atalǵan buzýshylyqtar Qaraǵujy ózeni sýynyń „apelsın“ túske boıalýyna, onyń sapalyq jáne hımıalyq kórsetkishteriniń nasharlaýyna, sý obektisiniń tabıǵı gıdrohımıalyq rejıminiń buzylýyna ákeldi», — dep qosty ekologıa departamentinde.
Ekologtar lastaýshy zattardyń ózen aǵysymen ári qaraı taralý qaýpin de atap ótti. Tekserý nátıjeleri boıynsha bul qorshaǵan ortanyń jaı-kúıin nasharlatyp, aıtarlyqtaı ekologıalyq zalal keltiredi.
Sonymen qatar, lastaný tek sýǵa ǵana áser etken joq. Mamandar shahta sýlaryndaǵy zattardyń topyraqqa sińgenin anyqtady. «Shahta sýlaryndaǵy lastaýshy zattar topyraq jamylǵysyna enip, onyń hımıalyq quramynyń ózgerýine ákeldi», — delingen vedomstvo habarlamasynda.