Shyǵys Qazaqstan oblysynda Rahman qaınaryna baratyn joldy jóndeý demalysýshylarmen qaqtyǵystarǵa ákelip jatyr, dep habarlaıdy infohub.kz saıty.
QazAvtoJol kompanıasynyń málimetinshe, SHQO-da Qazaqstannyń basty týrısik marjany — Rahman qaınaryna baratyn joldyń qurylysy júrgizilýde. Jumystar Óskemen — Altaı — Úlken Naryn — Katonqaraǵaı — Rahman qaınary avtomobıl joly ýchaskesinde júrgizilýde.
«Jol jumysshylary men jol qozǵalysyna qatysýshylardyń qaýipsizdigin qamtamasyz etý maqsatynda asfáltbeton jabynyn tóseý kezeńinde saǵat 06:00-den 18:00-ge deıin ýaqytsha jol júrý shekteýi qoldanylady. Sonymen qatar, týrısik maýsymnyń qyzýlyǵy men azamattardyń kóptegen ótinishterin eskere otyryp, kún saıyn 12:00-den 13:00-ge deıin qosymsha kólik ótkizý uıymdastyrylǵan. Shekteýler dál qarqyndy jol jumystaryna jáne tar taýly ýchaskede qaýipsizdikti qamtamasyz etý qajettiligine baılanysty engizildi», — dep eskertti kompanıada.
Al QazAvtoJoldyń aqparaty boıynsha, sońǵy kúnderi jumys júrgizilip jatqan jerde jekelegen demalysýshylar tarapynan agressıvti minez-qulyq jaǵdaılary jıilegen. Balaǵattaý, qorqytý, jol tehnıkasynyń jumysyna kedergi keltirý, sondaı-aq jol qozǵalysy qaýipsizdigin qamtamasyz etetin qyzmetkerlerge qatysty kúsh qoldaný faktileri tirkelgen.
«Mundaı áreketterge jol berilmeıdi. Búgin nysanda jumys istep jatqan adamdar kúrdeli jaǵdaıda kún saıyn óz jumysyn atqaryp júr — erteń myńdaǵan týrıs Rahman qaınaryna qaýipsiz ári jaıly jete alýy úshin. Árbir qaqtyǵystan, tehnıkany buǵattaýdan nemese ýaqytsha júrý rejımin saqtamaýdan týyndaǵan kidiris jóndeý jumystarynyń aıaqtalý merzimine tikeleı áser etetinin túsiný mańyzdy. Basqasha aıtqanda, jol qyzmetterine qansha kedergi jasalsa, ýaqytsha shekteýler sonsha uzaq saqtalady», — dep túsindirdi kompanıadaǵylar.
Óńir turǵyndary men qonaqtaryna zorlyq-zombylyq qoldaný, qorqytý, balaǵattaý, sondaı-aq qyzmetkerlerdiń zańdy qyzmetine jáne jol-qurylys jumystaryn júrgizýge kedergi keltirý Qazaqstan Respýblıkasynyń zańnamasyna sáıkes jaýapkershilikke ákep soǵatyny eskertildi.