Mańǵystaý oblysynda Qazaqstandaǵy alǵashqy joba — oqýshylardyń rasıonyna ulttyq sýsyndy júıeli túrde engizý bastalady. Qyrkúıekten bastap Jańaózenniń 25 mektebinde balalarǵa túıe sútinen jasalǵan dástúrli sýsyn — tabıǵı shubat fastfýdqa paıdaly balama retinde berile bastaıdy, dep habarlaıdy infohub.kz saıty.
Jobanyń bastamashysy, Mańǵystaý oblysynyń ákimi Nurdáýlet Qılybaı mektep tamaqtanýynyń jańa baǵdarlamasyn iske qosýdy Memleket basshysy Qasym-Jomart Toqaevtyń kámeletke tolmaǵandardy zıandy taǵamnan qorǵaý jónindegi sońǵy tapsyrmalarymen baılanystyrdy.
«Búgin Memleket basshysy Qasym-Jomart Toqaev fastfýdtyń agressıvti jarnamasy máselesine jáne óskeleń urpaqtyń densaýlyǵyn qorǵaýǵa erekshe nazar aýdarý qajettigine toqtaldy. Bizdiń shubatty mektep tamaqtanýyna engizý jónindegi bastamamyz — osy baǵyttaǵy naqty qadam. Biz jergilikti óndiristiń tabıǵı jáne sapaly ónimderi balalarymyzǵa qoljetimdi bolýyn qamtamasyz etýimiz kerek», — dedi óńir basshysy.
Memleket basshysy zıandy taǵamdy nasıhattaý eldiń eńbek áleýetine tikeleı teris áser etip, densaýlyq saqtaý júıesine qosymsha júkteme týdyratynyn aıtqan bolatyn.
«Dárigerlerdiń baqylaýy boıynsha, qazir qant dıabetimen aýyratyn 7 myńǵa jýyq bala bar jáne bul kórsetkish azaımaı, tipti ósip otyr. Kóptegen memleketter óskeleń urpaqqa baǵyttalǵan quramynda maıy, qanty jáne tuzy joǵary ónimderdiń jarnamasyna tyıym salady nemese shekteıdi», — dep atap ótti Qasym-Jomart Toqaev.
Mańǵystaý oblysyndaǵy joba 26 tamyzda saltanatty túrde ashylǵan «Nar-Bota» shubat quıýdyń jańa sehynyń bazasynda júzege asyrylýda. Óndiris alańy 300 sharshy metrdi alyp jatyr, al kásiporynnyń jobalyq qýaty jylyna 400 tonna daıyn ónim shyǵarýǵa eseptelgen.
Tehnologıalyq tizbek barlyq negizgi kezeńderdi qamtıdy: shıki túıe sútin qabyldaý, ony óńdeý, quıý jáne keıinnen saqtaý. Óndiris alańynyń ashylýy túıe sharýashylyǵyna mamandanǵan jergilikti fermerlik sharýashylyqtar úshin turaqty ótkizý naryǵyn qalyptastyrady jáne óńirde tabıǵı shıkizatqa uzaq merzimdi suranysty qamtamasyz etedi.