«Shuǵyla Gold» altyn óndiretin kompanıasy 2025 jyldyń qorytyndysy boıynsha 4,76 mlrd teńge paıda tapty. Al 2024 jyly onyń shyǵyny 4,8 mlrd teńge bolǵan. Bul týraly kásiporynnyń qarjylyq eseptiliginde aıtylǵan, dep habarlaıdy infohub.kz saıty.
Kompanıanyń 2025 jylǵy túsimi 9,7 mlrd teńgege jetti, al bir jyl buryn bul kórsetkish 281,1 mln teńge edi. 2024–2025 jyldary túsimniń barlyǵy Dore qorytpasyn satýdan túsken kiris esebinen qalyptasty. Ondaǵy altyn men kúmistiń úlesi keminde 70% bolýy tıis. 2025 jyldyń sońynda jabylmaǵan shyǵyn 7,77 mlrd teńgeden 3,06 mlrd teńgege deıin qysqardy.
Abaı oblysyndaǵy Aqjal aýylynda tirkelgen «Shuǵyla Gold» kompanıasynyń jalǵyz ıesi — «Shuǵyla Kent» kompanıasy. Eki qurylymnyń da basshysy — Erǵalym Sadaqov. Óz kezeginde «Shuǵyla Kenttiń» ıesi — KST Production kompanıasy. KST Production-nyń birlesken ıeleri retinde Abzal Nýrıev pen Táslıma Sarsebaeva kórsetilgen. Abzal Nýrıev sonymen qatar Aqtóbedegi Azit kompanıasyna ıelik etedi.
«Shuǵyla Gold» qatty paıdaly qazbalardy geologıalyq barlaýǵa eki lısenzıa men óndirýge eki kelisimshartqa ıe. Kompanıanyń negizgi qyzmet túri — asyl metaldar men sırek metal kenderin óndirý dep kórsetilgen.
Buǵan deıin «Shuǵyla Gold» kompanıasynyń túpkilikti ıeleri qazaqstandyqtar Ásel Medeýova men Baqytjan Seıitjan bolǵan. Kompanıa 2026 jyly Shyǵys Qazaqstan oblysynyń Jarma aýdanyndaǵy Búkýı ózeni ańǵary men Balka Kolorado ýchaskesinde shashyrańqy altyn óndirýdi bastaýdy josparlaǵan, dep jazǵan «Kýrsıv». Bul ýchaskedegi S1 sanaty boıynsha rastalǵan qorlar taza asyl metaldyń 202,4 kelisin quraıdy.
Sonymen qatar «Shuǵyla Gold» 2027 jyly Abaı oblysynyń Jarma aýdanyndaǵy Aqdıngek ken ornynda quramynda altyny bar kendi ónerkásiptik óndirýdi bastaýdy josparlaǵan. Óndirýdi jylyna 100 myń tonna quramynda altyny bar ken óndiretin jobalyq qýaty bar karerde ashyq ádispen júrgizý kózdelgen. Barlyq altyndy bes jylda — 2027 jyldan 2031 jylǵa deıin alý josparlanǵan.