Shvesıanyń qarýly kúshteri áskerı-teńiz bazasynyń mańyndaǵy Reseıge tıesili jer ýchaskesin qaýipsizdik sebepterimen memleket menshigine alýdy úkimetten surady.
Áskerıler Stokgolm arhıpelagyndaǵy Mýskó bazasynyń janyndaǵy jaǵalaý aımaǵyn tárkileýdi surap, bul qadamdy "reseılik drondar qaýpi jáne jyljymaıtyn múliktiń menshik jaǵdaıymen" baılanystyrdy.
Shved basylymdarynyń habarlaýynsha, Reseı memleketimen baılanysy bar kásipker Mýskó aralynda sándi úı salyp jatqan. Alaıda úıdiń resmı ıesi — onyń áıeli, ol Reseı men Shvesıa azamattyǵyn qatar ustaıdy.
Eki jyl buryn Shvesıa Reseıdiń Ýkraınaǵa tolyq aýqymdy basyp kirýine baılanysty eki ǵasyrlyq áskerı beıtaraptyqtan bas tartyp, NATO-ǵa múshe boldy.
Áskerı vedomstvonyń málimdemesinde bul aımaq "Mýskó áskerı-teńiz bazasyn, ásirese drondardan qorǵaýdy nyǵaıtý úshin biregeı jaǵdaılarǵa ıe" delingen. Sondaı-aq reseılik dron soǵysynyń damýy "Shvesıa úshin qaýip-qater aıasyn ózgertkeni" atap ótilgen.
Qoǵamdyq telearna SVT bul jyljymaıtyn múlik "qarýly kúshterdiń kózine qandaı shanshyp turǵanyn" habarlady.
Qorǵanys mınıstri Pol Ionson el "eshkimniń nysanǵa kóz salýyna nemese qandaı da bir taktıkalyq artyqshylyqqa ıe bolýyna jol bermeýimiz kerek" dep málimdedi, dep habarlady Shvesıanyń TV4 telearnasy.
Qarýly kúshterdiń málimdemesinde Bas shtab bastyǵy Karl-Iohan Edstrómniń Shvesıa "Ekinshi dúnıejúzilik soǵys aıaqtalǵannan bergi eń aýyr qaýipsizdik jaǵdaıyna tap bolyp otyrǵanyn" aıtqany keltirilgen.
Reseılik kásipkerdiń qazir Shvesıada turatyny belgisiz. Onyń áıeli jyljymaıtyn múlikti 2017 jyldan beri ıelenip keledi dep habarlanady.