Shyǵys Qazaqstan oblysynda Rahmanov bulaqtaryna aparatyn Pıhtovka ózeninen ótetin kópirdiń qurylysy aıaqtaldy. «QazAvtoJol» ulttyq avtojol operatorynyń málimetinshe, qurylystyń uzyndyǵy 175 metr, al ol jer bederinen 45 metrge deıingi bıiktikte turǵyzylǵan, dep habarlaıdy infohub.kz saıty.
Sońǵy kezeń taý shatqalynyń eki jaǵasyn jalǵaǵan jetinshi aralyqty ornatý boldy. Kópir árqaısysy 24 metrden turatyn jeti aralyqtan jáne segiz tirekten turady — ekeýi jaǵalaýda, altaýy aralyqta. Barlyq tirekter ornatylyp, aralyqtardy montajdaý aıaqtaldy, alaıda nysanda abattandyrý jumystary jalǵasýda.
«Búgin biz úshin shynymen aıtýly kún. Pıhtovka arqyly ótetin kópir qurylysynyń aıaqtalýy — úlken komandanyń orasan zor eńbeginiń nátıjesi. Nysan kúrdeli taý jaǵdaıynda salyndy, munda árbir ınjenerlik sheshim barynsha dáldik pen jaýapkershilikti talap etti», — dedi «QazAvtoJol» AQ Shyǵys Qazaqstan oblystyq fılıalynyń dırektory Nurbek Temirhanov.
Qurylysqa 150-ge jýyq maman qatysty. Kúrdeli taý bederine baılanysty materıaldardy jetkizý men aýyr tehnıkanyń jumysyn qıyn qoljetimdi jerde uıymdastyrýǵa týra keldi. Beton jumystary úshin alańda jyljymaly beton zaýyty ornatyldy.
Qazirgi tańda kópirde beton tumsyqtar men qorshaýlar ornatylyp, parapetter montajdalyp, betkeıler «Reno» matrastarymen jáne gabıon qurylymdarymen nyǵaıtylyp, jol qaýipsizdigi sharalary júrgizilýde.
Asfáltbeton jabynyn qyrkúıektiń sońyna deıin tóseý josparlanýda. Barlyq abattandyrý jáne qaýipsizdikti qamtamasyz etý jumystary aıaqtalǵan soń kópir qozǵalysqa ashylýǵa daıyn bolady.
Buǵan deıin «Kýrsıv» Astanada Esil arqyly jańa segiz jolaqty kópir salynatynyn jazǵan bolatyn.