Shymkentte tozyǵy jetken jáne apatty úılerden 600-den astam otbasyn kóshirý josparlanyp otyr – megapolıstegi renovasıa baǵdarlamasyn 2030 jylǵa deıin aıaqtaý kózdelgen. Alaıda qala turǵyndarynyń bir bóliginde suraqtar týyndap otyr, dep habarlaıdy infohub.kz saıty.
Tozyǵy jetken úılerde turǵan otbasylar jańa páterlerdiń kiltin alyp jatyr. «Eski páterim nebári 24 sharshy metr edi, úı apatty bolatyn. Al jańasy – 41 sharshy metr. Maǵan bári qatty unaıdy. Egde jastaǵy adamdarǵa qolaıly jaǵdaı jasalǵan», – dedi qala turǵyny Qarshyǵa Álimova.
Qańyrap qalǵan alańdar men buzý jumystary kórshiles qalǵandar úshin synaqqa aınaldy. Adamdar endi sý, elektr jáne gaz úzdiksiz berilmeıtinine shaǵymdanady. «Ekinshi jyl úılerdi buzyp jatyr, al jeke sektor qaldy. Bizge úılerimiz úshin aqshalaı ótemaqy tóleımiz dep ýáde etken, biraq ázirge ún joq. Kútip júrmiz. Osynyń saldarynan qazir sýdyń sapasy nasharlady, jaryq únemi sónedi, gaz óshedi. Qysta ne isteıtinimizdi bilmeımin», – dep narazylyq bildirdi Shymkent turǵyny Ilsıa Shafıgýllına.
Degenmen jeke sektor máselesi ázirge ashyq kúıinde qalyp otyr. Kóksaı shaǵyn aýdanyndaǵy jeke turǵyn úılerdiń kóptegen ıesiniń qujattary tolyq rásimdelmegeni anyqtaldy.
«2030 jylǵa deıin qala boıynsha 66 úı – 600 páter boıynsha baǵdarlama bekitildi. Barlyq kópqabatty úılerdiń tehnıkalyq jaǵdaıyna tekserý júrgizildi. Tekserýdi arnaıy akkredıttelgen jáne atestattalǵan uıymdar júrgizdi», – dedi qalalyq Qurylys basqarmasy basshysynyń orynbasary Erdáýlet Ájibaev.
Baǵdarlamany jeke ınvestorlardyń esebinen iske asyrý josparlanyp otyr. Úsh kompanıa qazirdiń ózinde qyzyǵýshylyq tanytqan. Qurylys basqarmasynda qosty: eger basqa da tozyǵy jetken kópqabatty úılerdiń turǵyndary renovasıaǵa qosylǵysy kelse, nysandar tizimi keńeıtilýi múmkin.