Shymkentte jańa aınalma avtomobıl jolynyń qurylysyn bastaýǵa arnalǵan kapsýla salý rásimi ótti. Magıstral tranzıttik jáne aýyr júk kólikterin qala sheginen shyǵaryp, ońtústik óńir úshin jańa kólik baǵytyn qalyptastyrýǵa múmkindik beredi, dep habarlaıdy infohub.kz saıty.
Jobany BI Engineering & Construction quramyna kiretin «Kazahdorstroı» jáne «ABK-Avtodor» kompanıalarynyń konsorsıýmy júzege asyrady. Tolyq málimetti joba úılestirýshileri bólisti.
Shymkent Qytaı men Ortalyq Azıa elderin, sondaı-aq «Batys Eýropa – Batys Qytaı» halyqaralyq dálizin baılanystyratyn iri kólik baǵyttarynyń qıylysynda ornalasqan. Alaıda tolyqqandy aınalma joldyń bolmaýy tranzıttik kóliktiń bir bóliginiń qala arqyly ótýine ákep soǵady.
Jańa aınalma jol tranzıttik kólikke Shymkentke kirmeı-aq óz baǵytymen júrýge múmkindik beredi. Bul qalalyq jol jelisi men negizgi kireberisterdegi júktemeni azaıtyp, aýyr júk kólikteriniń qala sheginde bolýyn qysqartady.
«Aınalma jol tek Shymkent úshin ǵana emes, búkil ońtústik óńirdiń kólik júıesi úshin mańyzdy. Jańa baǵyt negizgi baǵyttar arasyndaǵy baılanysty yńǵaıly etip, logıstıka, óndiris jáne jol boıy servısin damytýǵa qosymsha múmkindikter beredi. Merdiger retinde bizdiń mindetimiz – osy aýqymdy ınfraqurylymdyq jobany tolyq kólemde júzege asyrý», – dedi joba jetekshisi Qýanysh Álmuhambetov.
Joba EPC-kontrakt – Engineering, Procurement and Construction (ınjınırıń, satyp alý jáne qurylys) boıynsha júzege asyrylýda. Bul – merdiger jobalaý, qajetti materıaldar men jabdyqtardy satyp alý, qurylys júrgizý jáne daıyn nysandy tapsyrys berýshige tapsyrý úshin jaýap beretin «kilt astynda» formaty.
Jańa jol irgeles aýmaqtardy damytýǵa jaǵdaı jasaıdy. Baǵyt boıymen logıstıkalyq jáne óndiristik alańdar, qoımalar, termınaldar men jol boıy servısi nysandary paıda bolýy múmkin. Joba «SHIHO» halyqaralyq logıstıkalyq jáne transshekaralyq ortalyǵyn damytýmen de baılanysty.
Ekonomıkalyq tıimdilik qurylys kezeńinen bastap-aq baıqalady. Joba qurylys materıaldaryna, tehnıka men kólik qyzmetterine suranys qalyptastyryp, ınjenerlik-tehnıkalyq jáne jumysshy personalyn jumyspen qamtamasyz etedi. Jol iske qosylǵannan keıin logıstıka, saýda, óndiris jáne jol boıy servısi qosymsha múmkindikterge qol jetkizedi.