Shymkenttik áıel sot arqyly óz atynan berilgen senimhattar men turǵyn úı men jer ýchaskesiniń jáne páterdiń satyp alý-satý sharttaryn jaramsyz dep tanytty. Ol áreket qabiletsizdigi saldarynan is-áreketin túsinbegenin aıtty, dep habarlaıdy infohub.kz.
Oqıǵa áıeldiń atynan resimdelgen senimhattar boıynsha jyljymaıtyn múliktiń satylýynan bastaldy. Nátıjesinde ol baspanasyz qalyp, týystarynda turýǵa májbúr boldy.
Sotta talapker senimhattardyń berilý jaǵdaıyn da, qujattarǵa qol qoıý sátin de esine túsire almaıtynyn aıtty. Oǵan qosa, sol kezeńde oblystyq psıhıkalyq densaýlyq ortalyǵynda emdelgen.
İs boıynsha jaýapkerler eki notarıýs jáne úsh týys boldy. Olar senimhattardy alyp, áıeldiń úıi men jer ýchaskesi jáne páterine bılik etken.
Sheshýshi róldi sot-psıhıatrıalyq saraptama atqardy. Mamandar áıeldiń 2019 jyldan beri este saqtaý, oılaý jáne ıntellektýaldy qabiletteriniń buzylýymen qatar júretin organıkalyq jeke bastyń buzylýymen aýyratynyn anyqtady. Sarapshylardyń qorytyndysy boıynsha, senimhattarǵa qol qoıylǵan kúni ol óz is-áreketiniń mánin túsine jáne ony basqara almaǵan.
Bul tujyrymdar medısınalyq qujattar, birneshe ret emhanaǵa jatqyzý, dıspanserlik baqylaý jáne klınıkalyq tekserý nátıjelerimen rastaldy.
«Shymkent qalasynyń aýdanaralyq azamattyq ister jónindegi soty isti qaraý barysynda jaýapkerler áıelden senimhattar alyp, onyń atynan áreket etip, oǵan tıesili jyljymaıtyn múlikke bılik etkenin anyqtady, sonyń saldarynan talapker baspanasynan aıyrylyp, týystarynda turýǵa májbúr boldy», – dep atap ótti sotta.
Sońynda taraptar bastapqy qalpyna qaıtaryldy, al áıeldiń múliktik quqyqtary qalpyna keltirildi. Sheshim zańdy kúshine endi.