Shymkentte «Jaılaýkól» saıabaǵyndaǵy djampıng-attraksıonnan qulaǵan qyz bala qolynyń synýymen jaraqat aldy. Oqıǵa 8 tamyz keshinde bolǵan. Zardap shekken qyzdyń anasynyń aıtýynsha, ol otbasymen shamamen 19:00-de Báıdibek bı dańǵylyndaǵy saıabaqqa kelgen, al 21:00 shamasynda qyzy djampıngke barǵan. Sekirý kezinde arqan úzilip, qyz qulap, jaraqat alǵan, dep habarlaıdy infohub.kz saıty.
Áıel áleýmettik jelilerde saıabaq ákimshiligi oqıǵadan keıin keshirim suramaǵanyn aıtqan. Ol Shymkent qalalyq ákimdigine saıabaq basshylyǵyn tekserý jáne atraksıondardyń tehnıkalyq jaǵdaıyn anyqtaý ótinishimen júgingen. Onyń aıtýynsha, «Jaılaýkólde» mundaı oqıǵalar buryn da bolǵan, biraq ol egjeı-tegjeıin aıtpaǵan. «Onda kóp bala demalady. Balalardyń densaýlyǵy men ómiri mańyzdy», — dep atap ótken zardap shekken qyzdyń anasy.
«Jaılaýkól» saıabaǵynyń ákimshiligi jarıalanymǵa jaýap berip, qyzdyń jaraqat alǵanyn rastady. Alaıda olar otbasy nazardan tys qaldy degen málimdememen kelispeıdi. Saıabaqtyń málimetinshe, qyzmetkerler dereý jedel járdem shaqyryp, qyzdy aýrýhanaǵa jetkizýge kómektesip, onyń jaqyndarymen baılanysqan. «Biz onyń ata-anasymen jáne jaqyndarymen baılanysyp, sol kezde-aq onyń jaǵdaıyna alańdaýshylyq bildirip, keshirim suradyq», — dep málimdedi saıabaq ókilderi.
«Jaılaýkólde» djampıng saıabaq ákimshiligine tıesili emes ekenin de naqtylady: atraksıon aýmaqta jumys isteıtin jalǵa alýshynyń menshiginde. Sonymen qatar ákimshilik bul oqıǵaǵa jaýapkershilikten bosamaıtynyn málimdedi. «Oqıǵa bolǵan aýmaqtyń ákimshiligi retinde biz de jaýapkershilikti ózimizden alyp tastamaımyz jáne barlyq mán-jaıdy tolyq ári obektıvti anyqtaýǵa múddelimiz», — delingen habarlamada. Saıabaqta kináni basqaǵa aýdarýǵa nemese oqıǵany jasyrýǵa nıet bildirmeıtinin, zańda kózdelgen tártippen barlyq mán-jaıdy anyqtaýdy qoldaıtynyn qosqan.