Shymkentte tórt bloger jaldamaly páterde TikTok jelisinde tikeleı efır júrgizip, «kúńkil gaz» paıdalanǵan jáne bylapyt sóılegen. Sot olarǵa ákimshilik qamaý jazasyn taǵaıyndady, dep habarlaıdy infohub.kz saıty.
Polısıanyń málimetinshe, efır barysynda qatysýshylar bylapyt sózder aıtyp, «kúńkil gaz» paıdalanǵan.
«Efırge qatysýshylar — Túrkistan oblysynyń týmasy, jelide «Aq jolbarys» degen laqap atpen tanymal 31 jastaǵy Appaz Beksultan, Qyzylorda oblysynyń týmasy, «Sampo» degen atpen tanymal 22 jastaǵy Amır Samat, Mańǵystaý oblysynyń týmasy 25 jastaǵy Joldas Nurǵazy jáne Túrkistan oblysynyń týmasy 26 jastaǵy Jumaǵul Erasyl Shymkenttegi jaldamaly páterde bolǵany anyqtaldy», — delingen habarlamada.
Atalǵan tórt adamnyń barlyǵy ákimshilik jaýapkershilikke tartylǵany belgili boldy.
«Sot sheshimimen Appaz Beksultan 17 táýlikke, Amır Samat 5 táýlikke, Joldas Nurǵazy 7 táýlikke, Jumaǵul Erasyl 5 táýlikke ákimshilik qamaýǵa alyndy», — dep qosty polısıa ókilderi.
Eske salaıyq, Almatyda Instagram paraqshasynda bylapyt sóılegen er adam 5 táýlikke qamaýǵa alynǵan bolatyn. Al buǵan deıin Almatylyq blogerler ádepsiz mazmundaǵy materıaldar úshin jáne tikeleı efırlerde bylapyt sóılegeni úshin qamaýǵa alynǵan edi.