Shymkenttegi birinshi qalalyq klınıkalyq aýrýhananyń hırýrgtary búırek jetkiliksizdiginiń sońǵy satysyndaǵy naýqasqa búırek transplantasıasyn jasady. Naýqas kóp jyl boıy gemodıalız apparatyna táýeldi bolǵan. Organ týys bolyp keletin donordan alyndy, dep habarlaıdy infohub.kz saıty.
Megapolıstiń densaýlyq saqtaý basqarmasy naqtylaǵandaı, naýqastyń negizgi dıagnozy — týbýloınterstısıaldy nefrıtten damyǵan sozylmaly termınaldyq búırek jetkiliksizdigi.
Operasıa aldynda eki naýqas ta muqıat medısınalyq tekserýden ótip, barlyq qajetti qujatqa qol qoıdy. Transplantasıa sátti ótti, qazir donor men resıpıent dárigerlerdiń baqylaýynda reanımasıada jatyr.
Dárigerlerdiń aıtýynsha, eki naýqastyń da jaǵdaıy turaqty, barlyq ómirlik kórsetkishteri qalypty. Transplantasıalanǵan búırek óz mindetin sátti atqaryp, tıisti deńgeıde jumys istep tur. Naýqastar mamandardyń qadaǵalaýymen qajetti em qabyldaýdy jalǵastyrýda.
Shymkent ákimdiginiń málimetinshe, bul — shymkenttik hırýrgtar jasaǵan 255-shi sátti búırek transplantasıasy.
Buǵan deıin Densaýlyq saqtaý mınıstrligi habarlaǵandaı, jyl basynan beri Qazaqstanda 132 yqtımal qaıtys bolǵannan keıingi donor anyqtaldy. Osy kezeńde dárigerler barlyǵy 205 transplantasıa jasady. Bólek atap ótýge turarlyq jaıt — mýltıorgandy donorlyqtyń 13 jaǵdaıy. Qaza tapqan adamdardyń organdary 42 ómirdi saqtap qaldy: hırýrgtar 14 búırek, 11 júrek, toǵyz ret baýyr, tórt ókpe jáne tórt qasań qabyqty transplantasıalady.
«Kýrsıv» buǵan deıin astanada bir donordyń uzaq ýaqyt kezekte turǵan úsh qazaqstandyqqa ómir syılaǵanyn jazǵan. Bir donorlyq proses aıasynda úsh naýqasqa transplantasıalaý úshin júrek, ókpe jáne baýyr alyndy.