Shymkentte 65 jastaǵy er adam kórshisimen bolǵan tóbelesten keıin qaza tapty. Daý úıiniń qaqpasynyń aldyna qoıylǵan kólikke baılanysty týyndaǵan, dep habarlaıdy infohub.kz saıty.
Kúndiz Hýrsanbek Tursynqulov nemerelerimen ýaqyt ótkizgen, al keshke týystaryna onyń qaza tapqanyn habarlaǵan. Qaqtyǵys sáti beınebaqylaý kamerasyna túsip qalǵan.
Aldyn ala derekterge sáıkes, 39 jastaǵy kórshisi zeınetkerdiń qaqpasynyń aldyna kóligin qoıǵan. Úı ıesi oǵan eskertý jasaýǵa shyqqan. Aýyzsha aıtys tóbeleske ulasyp, er adam birneshe soqqy alyp, asfáltqa qulaǵan. Barlyǵy onyń alty jasar nemeresiniń kózinshe bolǵan.
«Soqqydan keıin ol qulady, al ol ketip qaldy. Keıin joldyń ortasyna jetkende, tynysh qaıta oralyp, úıde turǵan kondısıonerdi alyp, óz úıine kirdi, qaqpany ashty. Onyń úıi arǵy jaqta, al kóligin osynda, osy jaqqa qoıǵysy keldi. Sodan urysyp, únemi janjaldasatyn», — dedi qaza tapqan adamnyń týysy Aınısa Japparqulova.
Jergilikti turǵyndardyń aıtýynsha, kúdikti buryn da kórshilerimen janjaldasqan. Olar sondaı-aq ony birneshe ret mas kúıinde kórgenderin aıtady.
«Jaman adam. Minezi janjalqoı. Аlkogól jáne basqa da zattardy qoldanady. Sondyqtan kópshilik onymen til tabysa almady», — dedi jergilikti turǵyn Bahadyr Islamov.
Oqıǵa ornyna kelgen dárigerler zeınetkerdiń qaza tapqanyn rastady. Kúdikti oqıǵadan keıin kóp uzamaı ustaldy.
«Alǵan dene jaraqattarynan zardap shegýshi oqıǵa ornynda qaza tapty. Kúdikti izin sýytpaı anyqtalyp, ustaldy», — dedi Shymkent qalasy PD krımınaldyq polısıa basqarmasy bastyǵynyń orynbasary Nurlybek Álibekuly.
Tergeý taǵaıyndalǵan saraptamalardyń qorytyndysyn kútýde. Olar alynǵannan keıin ustalǵan adamnyń áreketterine quqyqtyq baǵa beriledi. Qaza tapqan adamnyń týystary obektıvti tergeý júrgizýdi jáne kinálini jaýapkershilikke tartýdy talap etedi.