Shymkenttegi Dostyq kóshesinde bes jup egiz turady. Olardyń on balasy bir-birine jaqyn ornalasqan úılerde dúnıege kelgen. Eń kishileri mektepke endi daıyndalyp jatsa, úlkenderi óz otbasyn quryp úlgergen. Bul erekshe oqıǵa týraly Kursiv LifeStyle habarlady, dep jazady infohub.kz.
Otyrar.kz málimetinshe, eń kishi egizder Aıbar men Aıdarǵa qazir tórt jas. Ata-anasy balalaryn naǵyz batyr bolyp óssin degen tilekpen osylaı ataǵan. Syrttaı uqsas bolǵanymen, minezderi múldem bólek: biri sabyrly ári tynysh, ekinshisi tentek ári urynshaq.
Taǵy bir jup — Mánshúk pen Álıa mektepti bitirgen. Ekeýi de voleıbolmen aınalysyp, jarystarǵa qatysyp, júldeli oryndarǵa ıe bolǵan. Degenmen, qyzdardyń qyzyǵýshylyqtary ártúrli: Mánshúk bala kezinen sýret salýǵa áýes, shyǵarmashylyq baıqaýlarǵa qatysqan, al Álıa shet tilderin jaqsy kóredi.
Kóshedegi eń úlken egizder — Aıgúl men Ásel. Ekeýi de 25 jasta, otbasyn quryp, jeke turyp jatyr. Qyzdar bala kezinen mýzykamen aınalysyp, ónerge qyzyqqan.
Olardyń otbasynda egizder sırek emes eken. Aıgúl men Áseldiń arǵy ájesi 16 bala dúnıege ákelgen, onyń úsh retinde egiz bolǵan. Ákeleri Qanat Qaltaıuly bala kezinde qyzdaryn ajyratý qıyn bolǵanyn eske alady.
Osy úsh juptan basqa, kóshede taǵy eki jup egiz turady. Biri balabaqshaǵa barady, al Fatıma men Zýhra esimdi qyzdar bastaýysh synypta oqıdy.
Shymkent — Qazaqstanda egizder men úshemder jıi týatyn aımaqtardyń biri. 2024 jyldyń alǵashqy alty aıynda qalada 151 egiz jáne úsh úshem dúnıege kelgen.
Buǵan deıin «Kýrsıv» Qazaqstanda eki myńǵa jýyq otbasynda egizder dúnıege kelgenin jazǵan.