Shymkentte TikTok-te Nuraı Serikbaıdyń ólimine baılanysty «pyshaqpen 72 soqqy salar edim» dep jazǵan er adam polısıa jaýapkershiligine tartyldy. Bul oqıǵa áleýmettik jelilerde skrınshot taraǵan soń keńinen talqylandy, al qaıtys bolǵan qyzdyń otbasynyń advokaty quqyq qorǵaý organdaryna júgingen edi... dep habarlaıdy infohub.kz.
Pikir avtory — Shymkenttiń 37 jastaǵy turǵyny bolyp shyqty. Tergeý barysynda ol bul sózdi Nuraıǵa emes, ony óltirdi dep aıyptalǵan adamǵa qatysty aıtqanyn túsindirdi. Onyń aıtýynsha, ol kúdiktige qalaı áreket eter edi degen suraqqa jaýap bergen. Sondaı-aq ol qaıtys bolǵan qyzdyń otbasynan kópshilik aldynda keshirim surap, zorlyq-zombylyqty qoldamaıtynyn, biraq sóziniń maǵynasy burmalanǵanyn aıtty.
Shymkent polısıa departamenti pikir avtorynyń jeke basy anyqtalǵanyn rastady. «Kýrsıvtiń» saýalyna berilgen jaýapta: «Ol Qazaqstan Respýblıkasy Ákimshilik quqyq buzýshylyq týraly kodeksiniń 456-2-babynyń 3-1-bóligine sáıkes, ıaǵnı quqyqqa qaıshy kontentti ornalastyrǵany jáne taratqany úshin ákimshilik jaýapkershilikke tartyldy. Sonymen qatar, azamatpen mundaı quqyq buzýshylyqtardyń aldyn alý jáne Qazaqstan Respýblıkasy zańnamasynyń talaptaryn qatań saqtaý qajettigi týraly profılaktıkalyq áńgime júrgizildi», — delingen.
Eske salaıyq, 21 jastaǵy Nuraı Serikbaı 2026 jyldyń 11 qańtarynda Shymkentte óltirilgen edi. Tergeý derekteri boıynsha, aıyptalýshy qyzdy dúken mańynda kútip turyp, ólimge ákeletin pyshaq jaraqatyn salyp, qashyp ketýge tyrysqan, biraq kóp uzamaı ustalǵan. Buǵan deıin sotta kýáger shabýyl týraly aıtyp, qaıtys bolǵan qyzdyń aǵasy aıyptalýshynyń óltirýden buryn Nuraıdy urlamaq bolǵanyn málimdegen.