Shymkentte alıment boıynsha boryshker jeke sot oryndaýshysynyń oǵan 14 mln teńgeden astam qaryz eseptegen qaýlylaryna sotqa shaǵymdandy. Talap qanaǵattandyryldy, biraq ishinara, dep habarlaıdy infohub.kz saıty.
Shymkent sottarynyń resmı Telegram-arnasynda jazylǵandaı, qalalyq mamandandyrylǵan aýdanaralyq ákimshilik soty boryshkerdiń jeke sot oryndaýshysyna qatysty shyǵarylǵan qaýlylardy daýlaý týraly ákimshilik isin qarady.
Sot talqylaý barysynda jeke sot oryndaýshysynyń alıment boıynsha 14 mln teńgeden astam somaǵa qaryzdy aıqyndaý týraly qaýly shyǵarǵanyn anyqtady. Sonymen qatar ol qamtamasyz etý sharalaryn qoldandy: boryshkerdiń jyljymaly jáne jyljymaıtyn múlikterine tyıym saldy, sondaı-aq kólik quraldaryn ustaý jáne Qazaqstan Respýblıkasynyń sheginen shyǵýyn shekteý týraly qaýlylar shyǵardy.
Talap qoıýshy qaryzdyń esebimen kelispeı, jeke sot oryndaýshysy daýly kezeńdegi onyń naqty tabystary men zeınetaqy aýdarymdaryn eskermegenin málimdedi. Osyny negizge ala otyryp, ol shyǵarylǵan barlyq qaýlylardyń kúshin joıýdy surady.
İs materıaldary men zeınetaqy aýdarymdary týraly málimetterdi zerdeleı kele, sot qaryz somasyn aıqyndaý kezinde esep boryshkerdiń naqty tabysyn esepke almaı, durys júrgizilmegen degen qorytyndyǵa keldi. Talap qoıýshynyń quqyqtary men zańdy múddelerin qalpyna keltirý úshin qaryzdy qaıta esepteý qajet. Osyǵan baılanysty qaryzdy aıqyndaý týraly qaýly zańsyz dep tanylyp, kúshi joıyldy.
Múlikke tyıym salý, kólik quraldaryn ustaý jáne shyǵýǵa shekteý qoıý týraly talaptar bóliginde sot talap qoıýdan bas tartty. Sot túsindirgendeı, alıment boıynsha qaryzdyń bar ekendigi rastalǵan, al jeke sot oryndaýshysy qoldanǵan qamtamasyz etý sharalary sot aktisin oryndaýǵa baǵyttalǵan.
Túbinde sot sheshimimen talap qoıý ishinara qanaǵattandyryldy. Sheshim zańdy kúshine endi.