Shymkenttegi qylmystyq ister jónindegi sot alqasy Nuraı Serikbaıdy óltirgeni úshin sottalǵan Sherhan Aımahannyń isin apelásıalyq tártippen qarap, úkimdi ózgerissiz qaldyrdy, dep habarlaıdy infohub.kz saıty.
Shymkent sottarynyń resmı Telegram-arnasynda jazylǵandaı, apelásıalyq saty Aımahanǵa qatysty qylmystyq isti zerdeledi. Buǵan deıin birinshi satydaǵy sot ony Qylmystyq kodekstiń 99-babynyń 2-bóliginiń 5-tarmaǵymen (erekshe qatygezdikpen óltirý), Qylmystyq kodekstiń 115-1-babymen (stalkıng) jáne Qylmystyq kodekstiń 125-1-babynyń 1-bóligimen (nekege turýǵa májbúrleý) kináli dep tanyǵan. Qylmystardyń jıyntyǵy boıynsha oǵan ómir boıy bas bostandyǵynan aıyrý jazasy taǵaıyndalǵan.
Jábirlenýshiniń azamattyq talap-aryzy ishinara qanaǵattandyryldy: sottalǵan adamnan 25 mıllıon teńge moraldyq zıan ótemaqysy, sondaı-aq advokat qyzmeti úshin 5 mıllıon teńge óndirildi. Úkimmen kelispegen jábirlenýshi men sottalǵan adamnyń advokattary ony apelásıalyq tártippen shaǵymdandy.
Jábirlenýshi tarap apelásıalyq shaǵymynda moraldyq zıan somasyn 25 mıllıon teńgeden 10 mıllıard teńgege deıin ulǵaıtýdy surady. Sottalǵan adamnyń qorǵaýshylary óz shaǵymdarynda sot úkimin ózgertip, Aımahandy Qylmystyq kodekstiń 125-1-babynyń 1-bóligimen (stalkıng) aqtaýdy, Qylmystyq kodekstiń 99-babynyń 1-bóligimen (óltirý) kináli dep tanyp, oǵan ádil jaza taǵaıyndaýdy surady.
Prokýror úkimdi ózgerissiz, al apelásıalyq shaǵymdardy qanaǵattandyrýsyz qaldyrýdy surady.
Alqa isti qarap, Aımahannyń kináliligi týraly birinshi satydaǵy sottyń tujyrymdarymen kelisti jáne úkimdi joıýǵa nemese ózgertýge negiz tappady. Osyǵan baılanysty 2026 jylǵy 24 qyrkúıektegi qaýlymen úkim ózgerissiz qaldyryldy. Sot aktisi zańdy kúshine endi.
Eske salaıyq, qaıǵyly oqıǵa 11 qańtarda Shymkentte bolǵan. Óltirý, stalkıng jáne nekege turýǵa májbúrleý aıybymen sot tórinde Sherhan Aımahan jaýap berdi. 13 tamyzda ol ómir boıy bas bostandyǵynan aıyrý jazasyn aldy. Keıin sottalǵan adam apelásıalyq shaǵym bergeni belgili boldy.