Shymkentte qylmystyq ister jónindegi mamandandyrylǵan aýdanaralyq sot ashyq otyrysta 23 jyl buryn jasalǵan qylmys týraly isti qarap, er adamdy 13 jylǵa bas bostandyǵynan aıyrdy, dep habarlaıdy infohub.kz saıty.
Shymkent sottarynyń resmı Telegram-arnasynda jazylǵandaı, sottalýshy bir nemese birneshe qylmys jasaý úshin qurylǵan uıymdasqan topqa qatysqany, sondaı-aq aldyn ala sóz baılasý arqyly adamdar tobymen esirtki zattaryn birneshe ret zańsyz satyp alǵany, saqtaǵany, tasymaldaǵany nemese ótkizgeni úshin aıyptaldy — 1997 jylǵy redaksıadaǵy Qylmystyq kodekstiń 235-babynyń 3-bóligi jáne 259-babynyń 4-bóliginiń «a», «b» tarmaqtary boıynsha.
Sot 2003 jyldyń tamyzynda er adam esirtki zattaryn kóterme satyp alyp, basqa memleketterge ótkizetin halyqaralyq uıymdasqan qylmystyq toptarmen turaqty baılanys ornatqanyn anyqtady.
2003 jyldyń qazan aıynyń basynda qylmystyq qaýymdastyqtaǵy ózine júktelgen mindetterdi oryndaı otyryp, ol top jetekshisinen erekshe iri mólsherdegi geroındi ótkizý jóninde tapsyrma aldy.
2003 jyldyń 20 qarashasynda ol sybaılasymen birge Shymkentten Aqtóbe baǵytyna shyqty.
2003 jyldyń 22 qarashasynda Shymkent — Samara avtojolynda Aral mańynda sottalýshy otyrǵan kólik toqtatyldy. Kólikti tekserý barysynda otyn bagynan untaq tárizdi zat salynǵan 35 paket, naqtyraq aıtsaq, jalpy salmaǵy 34 047,41 gram bolatyn erekshe iri mólsherdegi geroın tárkilendi.
Osydan keıin sottalýshy halyqaralyq izdeýde boldy jáne 2024 jyly Reseıde ustalyp, 2025 jyly Qazaqstanǵa jetkizildi.
Er adam óz kinásin moıyndamaǵanymen, ol kýágerlerdiń aıǵaqtarymen, aýdıojazbalarmen, saraptama qorytyndylarymen, sondaı-aq basty sot talqylaýy barysynda zerttelgen istiń basqa da materıaldarymen tolyq dáleldendi.
Sottalýshy ózin aqtaýdy surady.
Sot is boıynsha sottalýshynyń qylmystyq jaýaptylyǵy men jazasyn jeńildetetin jáne aýyrlatatyn mán-jaılardy anyqtaǵan joq. Sot sottalýshyny taǵylǵan áreketterdi jasaǵany úshin kináli dep tanyp, oǵan túpkilikti jaza retinde 13 jylǵa bas bostandyǵynan aıyrý jazasyn taǵaıyndady.
Úkim zańdy kúshine endi.