Шымкентте жолдағы жаппай төбелестен кейін алып кетілген 40 жастағы күрес шебері Василий Колесниковты ұрлап өлтіру туралы резонансты іс бойынша үкім жарияланды, деп хабарлайды infohub.kz сайты.
Жәбірленуші тараптың адвокаты Талғат Есімов өзінің Telegram-арнасында хабарлағандай, алты сотталушыға 20 жылдан 23 жылға дейін бас бостандығынан айыру жазасы тағайындалды.
Осылайша, біреуі 23 жылға сотталды, тағы екеуі — 22 жылдан, қалған үшеуі — 21, 20,5 және 20 жылға бас бостандығынан айырылды. Тағы екі күдікті іздестіруде жүр.
Kazinform агенттігінің тілшісі хабарлағандай, үкім жарияланғаннан кейін судья Әбінұр Қарабаев сотталғандардың үшеуі бұрын қылмыстық жауапкершілікке тартылғанын, сондықтан оларға неғұрлым қатаң жаза белгіленгенін атап өтті.
Сот сондай-ақ Василий Колесниковпен бірге көлікте болған және шабуыл кезінде ауыр жарақат алған жәбірленуші Мақсат Қошқенбаевтың азаматтық талабын ішінара қанағаттандырды. Моральдық зиянның жалпы өтемақы сомасы 10 млн теңгені құрады.
Еске салайық, қаңтарда Шымкенттегі жол апаты туралы видео таралып, ол өліммен аяқталған жаппай төбелеске ұласқан еді. Екі көлік соқтығысқаннан кейін қақтығысқа үшінші көлік те қосылғаны айтылған. Соның салдарынан бір ер адам көптеген пышақ жарақатын алды, тағы біреуін қала сыртына күшпен алып кетіп, кейін оның денесі табылды.
Денсаулық сақтау басқармасы хабарлағандай, № 1 қалалық клиникалық ауруханаға 1990 жылы туған науқас ауыр жағдайда жеткізілді. Оған сол жақ кеуде қуысына пышақтың кіруі диагнозы қойылып, шұғыл хирургиялық операция жасалды. Жарақат алған адам реанимацияға жатқызылды.
Тамызда күрес шебері Василий Колесниковты өлтіру туралы ашулы іс бойынша сот басталды. Сот төрінде 6 адам отырды.