Shymkentte qapyryq ystyq ornady. Turǵyndar qajetsiz syrtqa shyqpaýǵa tyrysady. Kúndiz kósheler bosaıdy, sırek kezdesetin jaıaý júrginshiler kóleńkege tyǵylady. Bul týraly infohub.kz habarlaıdy.
Kóshe termometrleri ystyqqa shydamaı, shamadan tys kórsetýde. Áleýmettik jelilerde qurylǵynyń 66 gradýsqa deıin kóterilgen vıdeolary taralýda. Tipti qysqa serýenniń ózi bas aýrýyna jáne densaýlyqtyń nasharlaýyna ákelýi múmkin.
Dárigerler mundaı aýa raıynda kún astynda uzaq bolýdan aýlaq bolý kerektigin eskertedi. «Barlyq mańyzdy isterdi saǵat 11-ge deıin rettegen jón. 11-den 17-ge deıin úı ishinde nemese kóleńkede bolyńyz. Baskıim kıý jáne eń bastysy – sý ishý. Eger jaǵdaı nasharlasa, adamdy úıge kirgizip, sýsyn berip, salqyn kompres qoıyńyz, biraq kondısıonerdiń astyna qoımańyz, salqyndatý birtindep bolýy kerek», – dep keńes berdi jedel járdem stansıasynyń №4 bólimshesiniń meńgerýshisi Janat Abıldanova.
Sınoptıkterdiń boljamynsha, anomaldy ystyq apta sońyna deıin saqtalady. Jaýyn-shashyn kútilmeıdi, aýa temperatýrasy joǵary deńgeıde qalady. «Qazaqstannyń ońtústik jáne shyǵys aımaqtaryna Ózbekstan aýdandarynan qurǵaq aýa massalary kelýin jalǵastyrady, bul negizinen jaýyn-shashynsyz ystyq aýa raıyn saqtaıdy. Kúndizgi ýaqytta termometrler ońtústikte 40-45 gradýs, shyǵysta 33-38 gradýs ystyqty kórsetedi», – dep habarlady ınjener-sınoptık Aknýr Aıtbaeva.
Joǵary temperatýraǵa baılanysty qalada Qoshqar-ata ózeni jaǵasynda demalýshylar sany kúrt ósti. Basty sebep – sýdyń temperatýrasy jyl boıy shamamen 11 gradýsty quraıdy. «Bul sýǵa túskende aldymen sýyq sıaqty, sodan keıin dene tez jylıdy. Munda múldem tońbaısyń. Sýdyń emdik qasıeti bar dep sanalady», – dedi qala turǵyny. Qoshqar-ata qaınar bulaǵy qasıetti sanalady. Mamandardyń aıtýynsha, sý aǵzaǵa paıdaly mıneraldar men mıkroelementter keshenin qamtıdy. Sondyqtan munda tek shymkenttikter ǵana emes, elimizdiń basqa aımaqtarynan da keledi. Ystyqtyń kelýimen demalyp jatqandar sany aıtarlyqtaı artty. Mamandardyń aıtýynsha, kún saıyn 15 myńǵa deıin adam shomylady. «Adamdar kúndiz de, túnde de shomylady. Tańǵy saǵat 5-ten bastap kele bastaıdy. Tipti túngi 1-2-de kelseńiz de, bir-eki myń adamdy kórýge bolady», – deıdi kúzetshi Maratjan Darhanuly.
Bılik ókilderi demalýshylardy tarıhy mol, qala turǵyndary úshin erekshe mańyzy bar orynǵa qurmetpen qaraýǵa, qaýipsizdik erejelerin umytpaýǵa jáne tabıǵatqa zıan keltirmeýge shaqyrady. Mindetti shart – óz qoqysyn jınaý.