Qytaı Halyq Respýblıkasynyń tóraǵasy Sı Szınpın úsh kúndik memlekettik saparmen Amerıka Qurama Shtattaryna keldi. Onyń ushaǵy 23 qyrkúıekte Vashıngton mańyndaǵy Endrús áýe bazasyna qondy. Qytaı kóshbasshysy men onyń jubaıy Pen Lıýandi ushaq baspaldaǵynyń janynda prezıdent Donald Tramp pen birinshi hanym Melanıa Tramp qarsy aldy, dep habarlaıdy infohub.kz saıty.
Kezdesý úshin uzyndyǵy shamamen 30 metrlik qyzyl kilem tóseldi. Eki kóshbasshy qol alysyp, birneshe mınýt áńgimelesti. Eki eldiń ánurandary shyrqalyp, saltanatty zeńbirek atyldy. AQSh prezıdenti shetel kóshbasshysyn Endrús áýe bazasynda sońǵy 11 jylda alǵash ret qarsy aldy.
Tramp pen Sı kelissózderge kirispesten buryn AQSh qarjy mınıstri Skott Bessent Vashıngton men Pekın arasyndaǵy saýda báseńdeýin 2027 jyldyń 10 qańtaryna deıin uzartý týraly ýaǵdalastyqty málimdedi. Buǵan deıingi merzim 10 qarashada aıaqtalatyn. Bessenttiń aıtýynsha, bul taraptarǵa keńirek ekonomıkalyq kelisimdi talqylaýǵa qosymsha ýaqyt beredi.
Pýsan kelisimi dep atalatyn qujat Tramp pen Sıdiń 2025 jyldyń qazanynda Ońtústik Koreıadaǵy kezdesýinen keıin jasalǵan bolatyn. Ol saýda shıelenisin tómendetý sharalaryn, sonyń ishinde kóterilgen keden bajynyń bir bóligin toqtata turýdy kózdeıdi. Báseńdeýdi uzartý óz aldyna jańa aýqymdy saýda mámilesin jasaýdy bildirmeıdi.
Kóshbasshylardyń negizgi kelissózderi 24 qyrkúıekke josparlanǵan. Reuters dereginshe, taraptar saýdany, sırek kezdesetin mıneraldardy, jasandy ıntellektti jáne Taıvandi talqylaýy múmkin. Agenttik derekkózderi yqtımal nátıjeler qatarynda jekelegen taýarlarǵa baj salyǵyn tómendetýdi jáne áskerı vedomstvolar arasyndaǵy dıalogty keńeıtýdi ataıdy.
Aq úı baǵdarlamasyna sáıkes, 24 qyrkúıekte resmı qarsy alý rásimi men memlekettik kesh ótedi. Reuters dereginshe, shaqyrylǵandar qatarynda Sem Áltman, Djensen Hýang jáne Tım Kýk sıaqty iri tehnologıalyq kompanıalardyń basshylary bar. 25 qyrkúıekke AQSh Ulttyq muraǵatyna barý josparlanǵan, sodan keıin sapar aıaqtalady.