Atyraý oblysyndaǵy polıetılen óndiretin Silleno zaýytynyń qurylys alańyna bıiktigi 101,8 metr etılen fraksıalaý kolonnasy ornatyldy. Qurylymnyń dıametri 7,5 metr, salmaǵy 1,8 myń tonnadan asady. Bul týraly Kazenergy qaýymdastyǵy QazMunaıGazǵa silteme jasap habarlady, dep jazady infohub.kz saıty.
Kolonnany Qazaqstanda — «AtyraýNefteMash» zaýytynda jasap shyǵardy. Ol pırolız qondyrǵysynyń negizgi elementteriniń birine aınalyp, polıetılen óndirýdiń basty shıkizaty — etılendi bólip alýǵa paıdalanylady.
Qurylymdy montajdaýǵa júk kótergishtigi 4 myń tonna gýsenısaly kran men 1,7 myń tonnalyq qosalqy kran jumyldyryldy. Injenerlik operasıa shamamen bes saǵatqa sozyldy.
Jobany iske asyrýdyń jalpy úlesi 30%-dyq josparmen salystyrǵanda 38,5%-ǵa jetti. Qurylys alańynda 5 myńǵa jýyq adam men 500-den astam arnaıy tehnıka jumys istep jatyr.
Buǵan deıin Atyraý oblysynda jylyna 1,25 mln tonna polıetılen shyǵaratyn zaýyt salyp jatqan Silleno kompanıasy 2024 jyldyń qorytyndysy boıynsha 2,1 mlrd teńge shyǵynǵa ushyraǵany belgili boldy. 2023 jyly bul kórsetkish 1 mlrd teńge edi.
Quny 7,4 mlrd dollarlyq ınvestısıalyq joba polıetılen óndirýge shıkizat retinde Teńiz ken ornynyń gazyn paıdalanýdy kózdeıdi.
Zaýytty iske qosý 2029 jylǵa josparlanǵan. Atyraýdaǵy kásiporyn jobalyq qýatyna shyǵatyn 2030–2031 jyldary Qazaqstanda polıetılen tutyný qazirgi 190 myń tonnadan keminde 260–270 myń tonnaǵa deıin artady.