Qazaqstan Respýblıkasy Syrtqy ister mınıstrliginiń resmı ókili Janbolat Ýsenov vedomstvodaǵy brıfıńte shetelge shyǵatyn qazaqstandyqtarǵa birqatar keńes berdi, dep habarlaıdy infohub.kz saıty.

Janbolat Ýsenov Qazaqstan azamattarynyń shetelde birneshe ret qıyn jaǵdaıǵa tap bolǵanyn, oǵan baratyn eldiń zańdaryn bilmeý, sheteldik memleketterdiń mıgrasıalyq, vızalyq, tranzıttik jáne kedendik talaptaryn saqtamaý nemese bilmeý sebep bolǵanyn atap ótti.

Eń jıi kezdesetin máseleler — qazaqstandyqtardyń bolý merzimin buzýy, tyıym salynǵan nemese deklarasıalanbaǵan taýarlardy ótkizý áreketteri, sondaı-aq sheteldik memleketterdegi tranzıt jáne bolý erejelerin saqtamaýy.

«Shetelge shyǵar aldynda otandastarymyzdy baratyn eldiń, sondaı-aq tranzıttik memleketterdiń zańnamasyn, vızalyq jáne mıgrasıalyq talaptaryn muqıat zerdeleýge shaqyramyz. Pasporttardyń, vızalardyń, bolýǵa ruqsattardyń jáne ózge de qujattardyń qoldanylý merzimine erekshe nazar aýdarý qajet. Sonymen qatar medısınalyq saqtandyrýdy rásimdeýdi, avıabıletterdi tek resmı servıster arqyly satyp alýdy, avıakompanıalardyń bagaj jáne tranzıt talaptaryn saqtaýdy, qujattaryńyzdy úshinshi tulǵalarǵa bermeýdi, sondaı-aq ishindegisin naqty bilmeıtin bóten sómkelerdi, sálemdemelerdi jáne ózge de jiberilimderdi tasymaldaýǵa almaýdy usynamyz», — dedi QR SİM ókili.

Shetelge jumysqa, oqýǵa nemese emdelýge shyǵatyn azamattarǵa barlyq qajetti qujattardy, shaqyrtýlardy, eńbek kelisimsharttaryn jáne ruqsattardy rásimdeýdiń zańdylyǵyn aldyn ala tekserý usynyldy.

«Jappaı saparlardy uıymdastyrýshylarmen kelisimderdi tekserý, sondaı-aq tótenshe jaǵdaılarǵa arnalǵan is-qımyldardy josparlaý óte mańyzdy. Mysal retinde jaqynda AQSH-ta 200-ge jýyq qazaqstandyq stýdent baspanasyz qalǵan rezonanstyq jaǵdaıdy atap ótýge bolady», — dep qosty Ýsenov.

Sonymen qatar Qazaqstannyń dıplomatıalyq jáne konsýldyq mekemeleri azamattarǵa óz quzyreti sheginde qajetti kómek kórsetetini atap ótildi. Alaıda baratyn eldiń zańnamasyn saqtaý jáne belgilengen talaptardy oryndaý jaýapkershiligi tikeleı azamattyń ózinde.