Sıngapýr bıligi týý deńgeıin arttyrýdyń erekshe jolyn tapty: elde jup izdeýge arnalǵan memlekettik servıs jumysyn bastady. Ony halyq «memlekettik Tinder» dep atap úlgerdi. FirstDate dep atalǵan servısti memlekettik tehnologıalyq GovTech Singapore kompanıasy ázirlegen, dep habarlaıdy infohub.kz saıty.
Qazir platforma synaq rejıminde jumys istep tur — oǵan 21 men 35 jas aralyǵyndaǵy memlekettik qyzmetshiler qol jetkize alady. Tirkelý Singpass júıesi arqyly júzege asady, ol qazaqstandyq Egov-tyń balamasy. Qatysýshylar ózderiniń qyzyǵýshylyqtary, ádetteri, qundylyqtary jáne qarym-qatynastaǵy qalaýlary týraly saýalnama toltyrady.
Ádettegi tanysý qosymshalarynan ózgeshe, munda mıllıondaǵan saýalnamany sheksiz svaıptaý joq. Paıdalanýshylardyń qalaýyn eskeretin algorıtm bir áleýetti seriktesti tańdaıdy. Sáıkestik tabylǵan soń eki qatysýshy da SMS alyp, tanysýdy jalǵastyrǵysy kele me, joq pa — sheshýge 72 saǵat ýaqyt alady.
Economic Times jazýynsha, memleket shyǵynnyń bir bóligin tipti óteýi múmkin. FirstDate-te Date Quest atty arnaıy fýnksıa qarastyrylǵan: juptarǵa birlesken tapsyrma oryndaý usynylady, mysaly, buryn jep kórmegen taǵamyn dámin tatý. Osy úshin qatysýshylar úshinshi tarap seriktesiniń vaýcherin ala alady.
«Alaıda onyń mólsheri men sany aksıa sharttarymen shektelgen, sondyqtan servıs tolyq tegin keshki asqa kepildik bermeıdi», — dep atap ótti basylym.
GovTech sondaı-aq paıdalanýshylardyń derekteri monetızasıalanbaıtynyn jáne úshinshi taraptarǵa berilmeıtinin málimdedi.
Buǵan deıin Kursiv LifeStyle týýdyń rekordtyq tómendeýine baılanysty el bıligi ata-analarǵa memlekettik kómekti ulǵaıtqanyn jazǵan. 17 jasqa deıingi ár balaǵa memleket shamamen 70 myń sıngapýr dollaryn (shamamen 25,4 mln teńge) bólýdi josparlap otyr.