Sıngapýrdyń Joǵarǵy soty úndilik logıstıkalyq kompanıanyń bas dırektory Chander Agarvaldyń burynǵy súıikti qyzynan syılyqtary úshin 370 myń dollar óndirip alý týraly aryzyn qanaǵattandyrmady, dep habarlaıdy infohub.kz saıty.
Chander Agarval Felısıa Lımen 2022–2023 jyldary aralasqan. Ol kezde áıel ushaqta stúardessa bolyp jumys istep, joldasynan áldeqaıda az tabys tapqan. Mahabbat kezeńinde er adam oǵan Hermes, Dior jáne Prada markaly zattar syılap, ushaqtyń birinshi klass bıletterin satyp alyp bergen.
Qymbat syılyqtardan bólek, úndilik kásipker qyzdyń páterin «úılesimge keltirý» úshin fen-shýı mamanynyń qyzmetine myńdaǵan dollar jumsaǵan. Sonymen qatar ol onyń jeke shyǵyndaryn, saqtandyrýyn jáne ýnıversıtettegi oqý aqysyn tólep otyrǵan.
Aıyrylysqannan keıin Agarval osy shyǵyndardyń barlyǵyn qaryz dep tanýdy talap etip, sotqa júgindi. Syılyqtar men jumsalǵan qarajattyń jalpy qunyn ol 370 myń dollar dep baǵalady, dep habarlaıdy CNN.
Alaıda Sıngapýrdyń Joǵarǵy soty aryzdy qabyldamady. Sýdıa Chander men Felısıanyń messendjerlerde belsendi hat jazysqanyn, biraq onda áıeldiń zattar men aqshany qaryzǵa alǵanyn dáleldeıtin derek joq ekenin atap ótti.