Damask soty Sırıanyń burynǵy prezıdentiniń nemere aǵasy Ýásim Asadty adamzatqa qarsy qylmys jáne soǵys qylmysy dep tanylǵan qasaqana kisi óltirý men azaptaýlar úshin kináli dep tanyp, ólim jazasyna kesti, dep habarlaıdy infohub.kz.
RIA Novostı Sırıanyń memlekettik SANA agenttigine silteme jasap, sot Ýásim Asadty birneshe adamdy qasaqana óltirdi jáne azaptaýǵa baılanysty qylmystar jasady dep tapqanyn habarlaıdy. Sýdıa Fahr ad-Dın ál-Arán úkimdi jarıalady: «Sot aıyptalýshy Ýásim Asadty birneshe adamdy qasaqana óltirýde, sondaı-aq azaptaýǵa baılanysty qylmystarda kináli dep tanydy, bul qylmystar adamzatqa qarsy qylmys jáne soǵys qylmysy retinde saralandy. Sot aıyptalýshy Ýásim Asadqa ólim jazasyn taǵaıyndaý týraly sheshim qabyldady».
Sonymen qatar, sot sottalǵannyń jyljymaly jáne jyljymaıtyn múlkin memleket paıdasyna tárkileý týraly sheshim shyǵardy.
Ýásim Asadqa qatysty proses Damask qylmystyq sotynyń tórtinshi ınstansıasynda ótti. Sırıa bıligi ony 2025 jyldyń maýsymynda Sırıa-Lıvan shekarasynda ustaǵan bolatyn. Buǵan deıin Sırıanyń burynǵy prezıdenti Bashar Asadtyń syrttaı ólim jazasyna kesilgeni habarlanǵan edi.
Eske salaıyq, 2024 jyldyń jeltoqsan aıynyń basynda Sırıa astanasy kóterilisshilerdiń qolyna ótken bolatyn. Olar shabýyldy bastaǵannan keıin eki aptadan az ýaqyt ishinde birneshe iri qalalardy baqylaýǵa aldy. Osydan keıin Sırıa prezıdenti Bashar Asad prezıdenttik laýazymyn tastap, elden ketip, bılikti beıbit jolmen berýdi tapsyrǵan edi.
Asad otbasymen birge Máskeýge keldi. Reseı prezıdentiniń baspasóz hatshysy Dmıtrı Peskov Vladımır Pýtınniń Bashar Asadqa baspana berý týraly sheshimdi jeke ózi qabyldaǵanyn málimdedi. Sáýir aıynyń sońynda Reseı Sırıanyń jańa úkimetiniń qulatylǵan prezıdentti ekstradısıalaý týraly ótinishin qabyldamaǵany habarlanǵan.