Kalıfornıadaǵy Six Flags Magic Mountain oıyn-saýyq saıabaǵy júzdegen adam mı jaraqatyn alǵanyn alǵa tartqannan keıin tanymal X2 atraksıonyn birjola jabatynyn habarlady, dep jazady infohub.kz saıty.
Saıabaqtyń basty tartymdarynyń biri sanalǵan X2-ge kezek uzaq turatyn, al oryndyqtary 360 gradýsqa aınalatyn. Ol shilde aıynan beri jabyq tur.
Six Flags atraksıonnyń birqatar qaýipsizdik synaǵynan ótkenin málimdedi. Degenmen kompanıa ony «durys sheshim» dep eseptegendikten toqtatýǵa bel býdy.
Bul sheshim X2-ge mingen júzdegen adam mı jaraqatyn aldy degen sot isteri men buqaralyq aqparat quraldarynyń habarlarynan keıin qabyldandy. Talapkerlerdiń bir bóligin qorǵaıtyn zań fırmasy sheshim óz klıentteri úshin «tym kesh» qabyldanǵanyn aıtty.
Seısenbi kúni jabylýdy jarıalaǵan Six Flags Magic Mountain saıabaǵynyń prezıdenti Braıan Oerdıng: «Atraksıon qaýipsizdigi — bizdiń bıznesimizdiń negizi. Qonaqtardyń senimine nuqsan kelgenin baıqasaq, oǵan baıyppen qaraımyz», — dedi.
Saıabaqqa qarsy azamattyq sot isterin qozǵaǵan Dordick Law Corporation fırmasy júzdegen adamnyń habarlasqanyn, olardyń jaraqattaryn osy atraksıonnan alǵanyn aıtqanyn málimdedi.
«Olar X2-ge áser alýǵa mindi. Al ornynan aýyr mı jaraqatymen turdy. Keıbireýi shuǵyl mı operasıasyn jasatýǵa májbúr boldy. Taǵy bireýleri burynǵy ómirine oralý úshin áli kúresip júr», — dedi fırma óz málimdemesinde.
Zań fırmasy atraksıonnyń jabylýyn bolashaq qonaqtardy qorǵaý turǵysynan quptaıtynyn, biraq bul «qazirdiń ózinde zardap shekken adamdarǵa esh paıdasy joq» ekenin atap ótti.
Bastapqyda X dep atalǵan atraksıon 2002 jyly ashylǵan, alaıda birneshe aıdan keıin jobalaý kemshilikterin jóndeý úshin jabylǵan. Keıin 2007 jyly vagondaryn jeńilirek nusqasyna aýystyrý úshin taǵy jabyldy. Kelesi jyly X2 degen ataýmen qaıta ashylyp, sodan beri oǵan 16 mıllıonnan astam adam mingen.
2022 jyly X2-ge mingennen keıin qaıtys bolǵan 22 jastaǵy Krıstofer Hoýlıdiń otbasyn qorǵaǵan zań fırmasy jabylý jetkiliksiz dep sanaıdy.
Hoýlı otbasy «Six Flags aqyry X2-ni jabatynyn estip jeńildep otyrǵanymen, Krıstofer Hoýlıdi jıyrma jylǵa jýyq ýaqyt boıy jumys isteýine ruqsat etilgen qaýipti atraksıon óltirgenin ózgertpeıdi» deıdi. Bul týraly Wisner Baum LLP fırmasynyń advokaty Brent Ýızner BBC-ge bergen málimdemesinde aıtty.
Hoýlıdiń otbasy taqyryptyq saıabaqpen tamyz aıynda abaısyzda ólimge ákep soqtyrý týraly sot isin bitimgershilikpen sheshti.
«Bul qaıǵyny qaıtaryp alý múmkin emes», — dedi Ýızner zań reformasyn, aldyn ala retteýdi jáne tıisti memlekettik qadaǵalaýdy talap etip.
«Jetkilikti adam zardap shekkennen keıin ǵana durys áreket jasaýdy paıdaǵa baǵyttalǵan korporasıalarǵa senip qalmaýymyz kerek. X2 ornyna keletin nárse qaýipsiz bolsyn dep úmittenemiz», — dep qosty ol.