Sıetldegi azyq-túlik festıvalinde bolǵan atystan eki adam qaza taýyp, bes adam jaralandy, dep habarlaıdy infohub.kz saıty.
Jeksenbi kúni keshke Ǵarysh ınesi mańyndaǵy Sıetl ortalyǵynda ótip jatqan «Bıt of Sıetl» azyq-túlik festıvalinde atys boldy. Qalalyq órt sóndirý qyzmeti ókiliniń aıtýynsha, oqıǵa saldarynan eki adam qaza taýyp, bes adam jaralandy. Atystan keıin polısıa turǵyndardy bul aımaqtan aýlaq bolýǵa shaqyrdy.
Harborvú medısınalyq ortalyǵynyń ókili Súzan Greggtiń málimetinshe, olarǵa tórt zardap shegýshi jetkizilgen, sonyń ishinde bir sábı, 23 jastaǵy er adam jáne eki áıel bar. Bir naýqastyń jaǵdaıy aýyr dep baǵalanyp otyr.
Oqıǵa kýágeri Estan Ýakonabonyń aıtýynsha, ol qyz-dosymen birge festıválde fotosýretke kezekte turǵanda, artynan bireý ıterip jibergen. Sodan keıin ol adamdardyń úreılenip qashqanyn kórgen. «Adamdar tyǵylyp jatyr, ıterisip jatyr, jerge qulap jatyr, balalar arbalary da qulady», – deıdi Ýakonabo. Ol dybystardy estigende atys ekenin túsingenin aıtady. Qyz-dosyn qaýipsiz jerge aparyp, oqıǵa ornyna qaıta oralǵanda, birneshe jábirlenýshini jerde jatqan kúıi kórgen.
Aıta keteıik, jyl saıyn ótetin bul festıvál 1982 jyly bastalǵan jáne úsh kún ishinde shamamen 350 000 adamdy tartady.