Qazaqstannyń Aýyl sharýashylyǵy mınıstrligi sıyr eti baǵasynyń kúrt ósýin kútpeıdi. Qazirgi tańda elimiz boıynsha bul ettiń ortasha baǵasy shamamen 3,8 myń teńge, al Astanada keıbir bazarlarda baǵa 4,5 myń teńgege deıin jetedi, dep habarlaıdy infohub.kz saıty.
Brıfıńte jýrnalıser et baǵasynyń qymbattaýyna nazar aýdaryp, jaqyn arada baǵa qalaı ózgeretinin surady. Aýyl sharýashylyǵy vıse-mınıstri Nazgúl Hatepovanyń aıtýynsha, vedomstvo bazarlardaǵy ónim baǵasyn kún saıyn baqylap otyrady.
«Et baǵasyna keletin bolsaq, búgingi statısıkalyq derekter boıynsha respýblıka boıynsha sıyr etiniń bir kelisiniń ortasha baǵasy — 3 800 teńge. Astanada da 3 800-den 4 000-ǵa deıin, odan joǵary da bar. Bazarlarda da kún saıyn monıtorıń júrgizip otyrmyz, mysaly, Shapaǵatta et 3 500 teńge tursa, Artemde shamamen 4,5 myń teńge», — dedi vıse-mınıstr Nazgúl Hatepova.
Aýyl sharýashylyǵy mınıstrliginde baǵanyń kúrt ósýine eshqandaı negiz joq dep sanaıdy. Vıse-mınıstr muny óz óndirisiniń kólemimen jáne mal basynyń ósýimen túsindirdi.
«Sonymen qatar, kúrt ósýge eshqandaı negiz kórip otyrǵan joqpyz. Iaǵnı ishki naryq tolyǵymen óz óndirisimizdiń esebinen qamtamasyz etilgen. Ótken jyldyń qorytyndysy boıynsha 434 myń tonna sıyr etin óndirdik. Bıylǵy jyldyń 8 aıynyń qorytyndysy boıynsha da óndiris kóleminiń ósýin kórip otyrmyz, mal basy da ósip keledi. Sondyqtan sıyr eti baǵasynyń kúrt ósýine eshqandaı negiz joq», — dep qosty Hatepova.
Buǵan deıin «Kýrsıv» Qazaqstanda et baǵasy 28,6%-ǵa óskenin jazǵan bolatyn.