Semeı garnızonynyń áskerı soty turǵyn úı komısıasynyń sheshimin zańsyz dep tanyp, áskerı qyzmetshige aqshalaı ótemaqy tóleýdi mindettedi, dep habarlaıdy infohub.kz.
QR Áskerı sotynyń resmı Telegram-arnasynda habarlanǵandaı, Semeı garnızonynyń áskerı soty áskerı qyzmetshiniń turǵyn úı komısıasy hattamasyn zańsyz dep taný jáne ony joıý, sondaı-aq aqshalaı ótemaqy tóleýdi mindetteý týraly talap aryzy boıynsha ákimshilik isti qarady.
Sot anyqtaǵandaı, er adam 1996 jyldyń shildesinen 1997 jyldyń qarashasyna deıin Taldyqorǵan garnızony boıynsha Memlekettik tergeý komıtetiniń áskerı-tergeý bóliminde, 1997 jyldyń qarashasynan 1999 jyldyń shildesine deıin QR İİM-niń áskerı-tergeý organdarynda áskerı qyzmet ótkergen. 2026 jyldyń sáýirinde ol aqshalaı ótemaqy tóleý týraly raportpen júgingen.
Turǵyn úı komısıasynyń hattamalyq sheshimimen talapkerge aqshalaı ótemaqy tóleýden bas tartyldy, sebebi Memlekettik tergeý komıtetindegi jáne QR İİM-niń áskerı-tergeý bólimshelerindegi qyzmet quqyq qorǵaý qyzmeti bolyp tabylady jáne QR Qarýly Kúshterine jatpaıdy.
QR «Áskerı qyzmet jáne áskerı qyzmetshilerdiń mártebesi týraly» Zańynyń 1-baby 20-tarmaǵyna sáıkes áskerı qyzmetshiler — Qazaqstan Respýblıkasynyń Qarýly Kúshterinde, basqa da áskerler men áskerı quralymdarda áskerı qyzmette turatyn Qazaqstan Respýblıkasynyń azamattary.
QR «Qorǵanys jáne Qazaqstan Respýblıkasynyń Qarýly Kúshteri týraly» Zańynyń 1-baby 15-tarmaqshasyna sáıkes basqa áskerler men áskerı quralymdar — Shekara qyzmeti, Avıasıalyq qyzmet, Shekara akademıasy, QR UQK-niń áskerı kontrbarlaý jáne áskerı polısıa organdary jáne Qazaqstan Respýblıkasynyń zańnamasynda belgilengen tártippen aıqyndalatyn ulttyq qaýipsizdik organdarynyń ózge de bólimsheleri, Qazaqstan Respýblıkasy Memlekettik kúzet qyzmetiniń arnaıy maqsattaǵy kúshteri, QR Ulttyq ulany, QR İİM-niń áskerı-tergeý organdary, azamattyq qorǵaý salasyndaǵy ýákiletti organnyń azamattyq qorǵanys basqarý organdary men áskerı bólimderi, áskerı prokýratýra organdary.
Zańnyń osy normasynyń maǵynasynan QR İİM-niń áskerı-tergeý organdary basqa áskerler men áskerı quralymdarǵa jatatyny kórinedi. Sot áskerı qyzmetshiniń talap aryzyn qanaǵattandyryp, turǵyn úı komısıasynyń sheshimin zańsyz dep tanyp, jaýapkerdi talapkerge aqshalaı ótemaqy tóleýge mindettedi.
Sheshim zańdy kúshine engen joq.